3 Бардыгы /

К.Ш. Токтомаматов атындагы Эл аралык университетте (ЭАУ, Жалал-Абад шаары) 8-март – Аялдардын эл аралык күнүнө карата “ЭАУнун сулуусу – 2025” аттуу сулуулук, сымбаттуулук жана чыгармачылык сынагы өткөрүлдү. 

ЭАУнун Кесиптик багыт берүү & коомчулук менен байланыштар кызматы билдиргендей, сынактын катышуучулары болгон чеберчиликтерин өздөрүн тааныштырууда, музыкалык номерлерди аткарууда, акыл таймашта, мода көрсөтүүдө жана башка чыгармалык багыттарда жөндөмдөрүн көрсөтө алышты. Аталган сынакты бир катар чыгармачыл инсандар, топтор, демөөрчүлөр колдошту, алардын ичинде Токтосун Тыныбеков атындагы Жалал-Абад областтык филармониясынын директорунун милдетин аткаруучу, таанымал ырчы Дилкумар Жолдошева, белгилүү “Азем” бий тобунун жетекчиси Каныкей Алиева, “Орифлейм” косметикасынын соода кеңсесинин өкүлү Канышай Кушакова, маркетолог Анаржан Акынова, “Выжимка” кофейнясынын өкүлдөрү жана башкалар. Сынактын калыстар тобунун компетенттүүлүгүн өзгөчө белгилеп кетүү зарыл. Сынак күйөрмандардын кызуу колдоосунда өтүп, катышуучулар төмөнкүдөй  байгелүү орундарды ээлешти: 1-орун жана “ЭАУ сулуусу – 2025” ардактуу наамы – Эл аралык Кыргыз-Түрк институтунун “Туризм” багыты боюнча 1-курстун студенти Нурила Авазбекова; 2-орун жана “ЭАУ сымбаты – 2025” ардактуу наамы – Гуманитардык-экономикалык колледждин “Башталгыч класстарда окутуу” адистиги боюнча 2-курстун студенти Алия Абдрахманова; 3-орун жана “ЭАУ таланты – 2025” ардактуу наамы – Эл аралык Кыргыз-Түрк колледжинин “Банк иши” адистиги боюнча 2-курстун студенти Айзирек Сагындыкова. Байгелүү орун ээлерине жана активдүү катышуучуларга дипломдор, акчалуу сыйлыктар жана баалуу белектер тапшырылды.

Бул сынак университеттин Жаштар иштери боюнча комитетинин төрагасы Тагайбек Сүйүнбаев, Маданий-эстетикалык борборунун директору Муктар Гайымов тарабынан уюштурулду. Жыйынтыктап айтсак, “ЭАУнун сулуусу – 2025” сынагы абдан кызыктуу жана шаңдуу маанайда өткөрүлдү.