75 Бардыгы /

Бүгүн, 26-августта К.Ш. Токтомаматов атындагы Эл аралык университеттин (ЭАУ, Жалал-Абад шаары) жыйындар залында “Алтын казык – доор өзгөрткөн билим” аттуу Жалал-Абад областынын мугалимдеринин август кеңешмеси өттү.

Кеңешме Жалал-Абад областтык билим берүү усулдук борборунун директорунун милдетин аткаруучу Айылчы Гулатовдун жетекчилигинде уюштурулду. Кеңешмеге Кыргыз Республикасынын агартуу министри Догдуркүл Кендирбаева жана Кыргыз Республикасынын Президентинин Жалал-Абад областындагы ыйгарым укуктуу өкүлүнүн орун басары Урматбек Самаев, областыбыздын район-шаарларынын билим берүү бөлүмдөрүнүн жетекчилери, мектептердин директорлору, мугалимдер катышышты.

Кеңешмеде 2024-2025-окуу жылынын жыйынтыктары жана жаңы окуу жылынын негизги иш багыттары, тапшырмалары каралды. Мында “STEM” (Science-Илим, Technology-Технология, Engineering-Инженерия жана Mathematics-Математика) сабактарынын мугалимдерине ноутбуктар берилди. Жалпылап айтканда аталган кеңешме абдан мазмундуу өттү.

Соңунда кеңешменин уюштуруучулары ЭАУ ректоратына окуу жайдын жыйындар залын, тийиштүү техникалык жабдыктарды бергендиги үчүн терең ыраазычылыгын билдиришти.

Агартуу кызматкерлерине жаңы окуу жылында ийгиликтерди каалайбыз!

Анвар ЖОЛДОШБАЕВ, ЭАУнун окуудан сырткары иштер, мамлекеттик тил жана коомчулук менен байланыштар боюнча проректору, фил.и.к., ЭАУнун профессору