1,779 Бардыгы /

БАТКЕН. Баткен шаарында милиция кызматкерлери, мектеп директорлору, социалдык коргоо бөлүмүнүн өкүлдөрү, билим берүү тармагынын жетекчилери катышкан кеңешмеде акыркы конгуроо салтанатына байланыштуу мектеп окуучуларынын коопсуздугу кенен-чонон талкууланды.

Кеңешменин жүрүшүндөмектеп бүтүрүүчүлөрү кафе-ресторандарда иш-чараларды өткөрүүсүнө, унааларда кортежге тизилип сейилдөөсүнө, ошондой эле өз алдынча тоолорго экскурсияларды уюштурууга таптакыр тыюу салынаары баса белгиленди. Жыйында мектеп бүтүрүүчүлөрүнүн коопсуздугун көзөмөлдөө ата-энелерге дагы кошо жүктөлөөрү катуу эскертилди. Жаш өспүрүмдөрдүн коопсуздугун толук кандуу көзөмөлдөө жана кылмыштуулуктун алдын алуу, укук бузууларга таптакыр жол бербөө максатында Баткен шаардык милициясы майрам күндөрү күчөтүлгөн тартипте гана иш алып бармакчы.

Белгилей кетчү жагдай: үстүбүздөгү жылдын акыркы айларында Баткен шаарында жаш өспүрүмдөр аралашкан 5 кылмыш катталып, мунун баарынын тең бети ачылды.

Алишер ТОКСОНБАЕВ, өз кабарчы