1,785 Бардыгы /

ОШ. Бул жөнүндө президенттин Ош облусундагы Өкүлүнүнүн орун басары Эрнис Толтоев сүйүнчүлөдү. Анын айтымында, Кыргыз Өкмөтү өткөн айда кабыл алган “Социалдык контракттын негизинде социалдык жардам берүү жөнүндө” токтомуна ылайык ар бир райондон чакан ишкерликти өнүктүрүүгө ынтызар үй-бүлөлөр иргелип алынат.

• Бул максатта Айыл өкмөттөрүндө жана райондордо

атайын комиссиялар түзүлдү. Бул саамалыкка кызыккан үй-бүлөлөр чакан бизнес долбоорлорун даярдашып, комиссияларга чекесинен тапшырып жатышат. Атайын комиссия аларды дыкаат караштырып чыгып, макулдук берген долбоорлорго гана ар бир үй-бүлөгө 100 миң сомдон берилет. Облустагы жети райондон дээрлик 50дөн үй-бүлө тандалып алынат, – деп кошумчалады президенттин Ош облусундагы өкүлүнүнүн орун басары Эрнис Толтоев.

Ош облусунда жалпысынан 16 жашка толо элек балдары бар 32 миңге жакын үй-бүлө жөлөк пул алышат. Ал эми Улуттук статистика комитетинин маалыматына ылайык, Кыргызстанда былтыр калктын акчалай кирешеси жалпысынан 542 миллиард сомду түзгөн. 2020-жылы эң бай катмар жалпы калктын болгон кирешесинин 41,6 пайызын алса, 2021-жылы бул көрсөткүч 43,9 пайызды чапчыды.

Жакырчылыктын деңгээлине жараша Кыргызстан Евразиялык экономикалык Биримдигине (ЕАЭБ) мүчө өлкөлөрдүн ичинен эң жогорку көрсөткүчтө калууда. Анткени, өлкөбүздүн кээ бир аймактарында, маселен Баткен, Жалал-Абад жана Нарында калктын 35 пайыз жакырчылык чегинен төмөнкү деңгээлде жашап жатышат.

Алишер ТОКСОНБАЕВ, өз кабарчы