1,881 Бардыгы /

          БАТКЕН. Бул маалыматты Президенттин Баткен обулусундагы ыйгарым укуктуу өкүлү Абдыкарим Алимбаев ырастады. Анын айтымында, окуя бүгүн, 14-сентябрда, эртең менен сегиздер чамасында Булак–Башы аймагында катталды.

-Эки өлкөнүн чек арачыларынын ортосунда атышуу жүрдү. Мен Тажикстандын Согдий облусунун губернатору Ражаббой Ахмадзода менен ок атууну токтотуу тууралуу бир нече жолу сүйлөштүм. Ущул тапта эки өлкөнүн чек ара башчылары окуя болгон жерге жөнөп кетишти. Жаңжал эмнеден чыкты? Ким баштады? Муну дыкаат иликтеп, ал аймакты кантип кайтаруу керектигин жөнгө салып, анан келишет. Булак-Башыда эч ким жашабайт. Анткени, тоолуу жер. Жапа чеккендер жок. Баткен облусундагы чек арадагы башка аймактар тынч! – деп кошумчалады Президенттин Баткен обулусундагы ыйгарым укуктуу өкүлү Абдыкарим Алимбаев.

Улуттук коопсуздук комитетине (УКМК) караштуу Чек ара кызматынын маалыматына караганда, 14-сентябрда эртең менен Булак-Башыдагы тактала элек аймакка (“Капчыгай” чек ара бекетинин аймагы) Тажикстандын “Кех” бекетинин чек арачылары куралчан кирип келишкен. Алар Кыргыз чек арачыларынын чыгып кетүү талабына баш ийбегендиктен, Кыргыз тарап эскертүү иретинде асманга үч жолу ок аткан. Ошол замат ортодо атышуу башталган. Эки тараптын чек ара башчылары ок атышууну токтотуп, жаңжалга байланыштуу өз ара жолугууну макулдашты.

Бирок,Тажикстандагы Өкмөтчүл “Хобар” маалымат агенттиги өлкөнүн Чек ара кызматына шилтеме жасап, “Кыргыз чек арачылары биринчи ок чыгаргандыгын, кошумча күч жана каражат алып келгенин” жазды. Баса, Булак-Башы аймагында чек арада соңку ирет ушул жылдын 14-июнь күнү таңга жуук ок атылган. Буга байланыштуу тараптар өз ара бири-бирин күнөөлөгөн. А түгүл Тажик тарап бир жараны жараат алгандыгын дагы жар салган. Булак-Башы айылы Тажикстандын Кыргызстандагы Ворух анклавы менен чектешкен аймакта жайгашкан. Ворухтан тышкары Кыргызстанда бул өлкөнүн Кайрагач деген анклавы дагы бар.Тажикстан соңку чек ара чатагы тууралуу маалымат бере элек.

Кыргызстан менен Тажикстандын ортосунда жалпысынан 972 чакырым чек ара тилкеси бар. Анын 664 чакырымы гана такталгандыгын Кыргызстандын президенти Садыр Жапаров ушул жылдын 16-апрелинде Фейсбуктагы расмий баракчасына жазган эле. Ал эми 17-апрелде Тажикстандын президенти Эмомали Рахмон Исфара районундагы сапарында бул маалыматты ырастаган.

Кыргыз-Тажик чек арасын тактоо иштери 2002-жылы башталган. Чек ара тактала электигине байланыштуу Кыргыз-Тажик чек арасында тынымсыз жаңжал чыгып турат.

Алишер ТОКСОНБАЕВ, өзкабарчы