942 Бардыгы /

ОШ. Ош облусунун Өзгөн районуна караштуу Кызыл-Октябрь айылынын 50 чакты тургуну кечээ, Кемпир-Абад маселесине байланыштуу кайрадан чогулушту. Алар тийиштүү адистерди аймакка сөзсүз келип, “Өзбекстанга берилди” делген жерлерди так көрсөтүп берүүсүн талап кылып жатышат.

• Чогулгандар менен азырынча милиция гана жолугуп, өз ара

сүйлөшүп жатат. Алар боз үй тигүүгө болбойт деп айтышып, а түгүл түнү эл тиккен бир боз үйдү алдыртып дагы салышты. Бирок, 50 чакты  тургун 1965-жылдары иштеген тийиштүү адистерди бул жерге чакырып, ошол жерлерди көрсөтүп берүүсүн катуу талап кылып жатышат. Ошол учурда бийликте иштегендердин айрымдары азыр дагы бар экен, келип көрсөтүшсүн? – деп тызылдады жергиликтүү тургун Кадырбек Карабаев.

Баса, Кемпир-Абад суу сактагычы боюнча чогулгандар а түгүл ушуд жылдын 16-октябрында элдик курултай өткөрүп, бул маселени ачык-айкын талкуулоону чечишти. Баса, нааразы тарап ушул жылдын 5-октябрь күнү бир боз үй тигип, мөөнөтсүз митинг улантылаарын шардана кылышкан. Бирок, түнү милиция тигилген боз үйдү буздуруп, митингди токтотууну талап кылып, анан дагы боз үйдү дароо алдыртып салышкан. Бул окуяга байланыштуу Ош облустук милициясы дагы билдирүү таратып, аталган мекеме коомдук тартипти көзөмөлдөөгө милдеттүү экендигин моюндады.

Айтмакчы, ушул жылдын 4-октябрында президент Садыр Жапаров Ош облусуна караштуу Өзгөн районунда Кемпир-Абад суу сактагычына байланыштуу эл менен жолугушкан. Ошол жерде чогулган айрым тургундар президент менен жолугушууга кире албай калышкандыгын дагы айтышып, жыйынды тышта ачык-айкын өткөрүүнү, бардык суроолорго ачык жооп берүүнү талап кылышкан. Президент Садыр Жапаров Кемпир-Абад боюнча 6-октябрда Фейсбукка пикирин дагы жазып, Кыргызстан менен Өзбекстан суу сактагыч боюнча 50/50 үлүштөгү биргелешкен ишкана түзүп, плотинаны чогуу башкаруу келишимине келгендигин жазган эле. Президенттин жолугушуусуна Жогорку Кеңештеги фракция лидерлери, айрым депутаттар дагы катышкан. Жолугушуу “Өтө эмоционалдуу” өткөндүгүн Жогорку Кеёещтеги “Альянс” фракциясынын лидери Жанарбек Акаев дагы моюндаган. Кездешүүгө катышкан “Бүтүн Кыргызстан” фракциясынын лидери, депутат Адахан Мадумаров журналисттердин суроолоруна жооп кайтарып жатып, Кемпир-Абад суу сактагычы Өзбекстанга өтүп, “4 миң гектардан ашыгыраак жер кеткендигин” ачыктаган.

Баса, Президенттин бул жолугушуусунан мурда дагы Өзгөн жергесинде Кемпир–Абад суу сакташычына байланыштуу бир катар нааразылык акциялары өткөн.

Алишер ТОКСОНБАЕВ, өз кабарчы