1,722 Бардыгы /

ЖАЛАЛ-АБАД. Сузактын Кара-Дарыя айылында селден жабыркаган 8 үй-бүлө жаңы конуштуу болду.

Кара-Дарыя айылында селден жабыркаган 8 үй-бүлөнүн жаңы конуштарынын тапшыруу аземине Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, Жогорку Кеңештин депутаты Жеңиш Токторбаев, Сузак районунун акими Баратбек Сыдыкназаров жана жергиликтүү тургундар катышты.

Кара-Дарыя айыл аймагынын Чаңгыр-Таш айылында бир жылдан бери вагондо жашап келген тургундар эми жаңы турак жайлуу болушту. 8 үй-бүлөнүн турак үйү өткөн жылы селден жабыркап, жашоого таптакыр жараксыз абалга кептелген.

Үй салууга чамасы жетпеген тургундарга жер тилкеси ажыратылып, үч бөлмөлүү турак жайга мамлекет тарабынан 5 млн. 600 миң сом акча каражаты бөлүнгөн. Мындан сырткары облустагы мекеме-ишканалардын кызматкерлеринин бир күндүк эмгек акылары которулган. Жалпысынан сегиз үйдү курууга 12 млн. сом акча каражаты жумшалган.

Облус башчысы Абсаттар Сыргабаев, табият кырсыгынан жабыркаган жарандарды жаңы турак жайлуу болушу менен куттуктады. Өкүл мамлекет тарабынан жардамга муктаж үй-бүлөлөр ар дайым унутта калбасын белгилеп, айыл тургундарына түзүлүп жаткан шарттар тууралуу маалымат берди.