948 Бардыгы /

     КР ӨКМдин Жалал-Абад облусу боюнча башкармалыгы райондук, шаардык бөлүмдөрү менен биргеликте облус аймагындагы чарбалык обьектилерде жана турак-жай секторунда өрткө каршы иш-чараларды жүргүзүп келишет. Жүргүзүлгөн иштерге карабастан 2023-жылдын январь айында Жалал-Абад облусунун аймагында 27 өрт кырсыгы катталса, алардын 23 турак жайларда катталган жана өрт кырсыгынан 2 жаран каза болсо, анын ичинен 1 жаш балдар, ошондой эле, 1 жаран күйүт жараттарын алышкан. Мындан тышкары 18 жаран от жагуучу мештен чыккан иске ууланып ооруканага кайрылып, 1 жаран каза болгон. Ошондуктан от жагууда өрт коопсуздук эрежелерине ылайык от  жагуучу мештерин, алардын морлорун тазалап, жылуулук системаларын оңдоо зарыл. Мындан тышкары, өрт коопсуздук эрежелерин бузуу менен чатырларда тоют сактоо да өрттүн тез өөрчүшүнө, зыяндын көбөйүүсүнө  өбөлгө түзөт.

Талдоолорго ылайык жогорудагы көпчүлүк өрт кырсыктары отко шалаакы жана камырабастык менен мамиле кылуудан, электр тогуна уланган бойдон унутта калтырылган электр шаймандарынан,  кароосуз калтырылган балдардын от менен ойноосунан, бузук абалдагы мештерден жана моорлордон келип чыгууда. Ал эми, көпчүлүк учурда, атуулдар уктап жаткан мезгилде эле, өрттөн чыккан түтүндөн, газдан ууланып каза болушууда.

Кышкы өрт кооптуу мезгилге карата Өзгөчө кырдаалдар министрлигинин Жалал-Абад облусу боюнча башкармалыгынын  райондук, шаардык бөлүмдөрүнүн  өздүк курамы тарабынан  турак жай ээлерине  профилактикалык иш-чараларды жүргүзүү  күчөтүлүп, азыркы учурда, 12 миңден ашуун турак-жай ээлерине күнүмдүк турмуштагы өрт коопсуздук чаралары боюнча түшүндүрүү иштери жүргүзүлдү.

Урматтуу Жалал-Абад облусунун тургундары!  Кышкы от жагуу мезгилинде турак үйлөрүңүздө өрт чыкпасын десеңиз, жогорудагы өрттүн келип чыгуу себептерине көңүл буруп, өз үйүңүздө аларды четтеттүүнү Өзгөчө кырдаалдар министрлигинин Жалал-Абад облусу боюнча башкармалыгы эскертет. 

Өрт же өзгөчө кырдаалга күбө болсоңуз токтоосуз 112, 101 номерлерине  кабарлаңыз.

К.КАРАБЕКОВ,  КР ӨКМдин Жалал-Абад облусу боюнча башкармалыгынын Өрт өчүрүү алдын алуу жана авариялык куткаруу иштери бөлүмүнүн улук офицери,  майор