1,515 Бардыгы /

ЖАЛАЛ-АБАД. Кечээ, 21-февралда Ички иштер министрлигинин Генералдар клубунун мүчөлөрү Кыргыз Республикасынын Президентинин 2021-жылдын 29-январындагы “Инсандын руханий-адеп-ахлактык өнүгүүсү жана дене тарбиясы жөнүндөгү” жарлыгынын негизинде, ошондой эле Ички иштер министри милициянын генерал-лейтенанты Улан Ниязбековдун демилгеси менен министрликтин 2023-жылдын13-февралындагы “Кыргыз Республикасынын ички иштер органдарынын кызматкерлеринин руханий адеп-ахлактык сапатын көтөрүү жөнүндө” №97-т сандуу тескемесинин атайын графигине ылайык Жалал-Абад облусуна келишип, милиция кызматкерлери менен жолугушту.

Жалал-АбадОИИБдин басма сө зкызматы билдиргендей, жолугушууга ички иштер министринин орун басары, милициянын генерал-майору Октябрь Урмамбетов, ИИМдин Генералдар клубунун төрагасы, милициянын отставкадагы генерал-майору Садырбек Дубанаев, ИИМдин Генералдар клубунун мүчөлөрү милициянын отставкадагы генерал-майорлору Рашид Тагаев, Абдукапар Мавлянов, Шеркозижан Мирзакаримов, Жалал-Абад ОИИБдин начальниги милициянын полковниги Жеңишбек Абитов, шаар-райондук ички иштер бөлүмдөрүнүн жетекчилери, өздүк курам жана ардагерлер кеңештеринин төрагалары катышты.

Алгач Жалал-Абад ОИИБдин начальниги милициянын полковниги Жеңишбек Абитов сөз сүйлөп, келген конокторду өздүк курамга тааныштырды. Андан соң гимн ырдалып, ички иштер министринин орун басары милициянын генерал-майору Октябрь Урмамбетовго сөз берилди.

Октябрь Урмамбетов ички иштер министри Улан Ниязбековдун 7 багыттагы приоритеттүү тапшырмаларын натыйжалуу аткаруу боюнча талаптарын өздүк курамга толугу менен жеткирип, ошондой эле бүгүнкү күндөгү кемчиликтерге токтолуу менен аларды жоюу максатында бир топ тапшырмаларды койду. 

Андан соң Генералдар клубунун төрагасы Садырбек Дубанаев сөзгө чыгып, милициянын тарыхына токтолуу менен азыркы учурду салыштырып, материалдык-техникалык базанын жетишкен заманында жана жакшы түзүлгөн шартта милиция кызматкери ак дилден кызмат өтөөсү керектигин баса белгиледи.

Генералдар клубунун мүчөсү Абдукапар Мавлянов кызматкерлерди талыкпастан окуп, билим алууга чакырды. Ар бир кызматкер тарыхты жакшы билиши керектигин жана өзү жакшы иштеп, мүнөзү, жүрүм-туруму менен милициянын тарыхында изин калтырууга умтулуу зарылдыгын айтты.

Андан кийин сөзгө Рашид Тагаев чыгып, кызматкер дүйнөдө болуп жаткан окуялардан кабардар болуп, дин багытында экстремисттик топторго каршы күрөшүүгө көңүл бурушу керектигин белгиледи. Заманбап технологиянын өнүккөн шартында, техниканы өздөштүрүп, кылмыштуулук менен күрөшүүдө максаттуу пайдаланууга үндөдү.

Ал эми Шеркозижан Мирзакаримов кызматкерлерди маданияттуу болуп, эл менен жолугушууда интеллектуалдык даражаны өркүндөтүп, негизгиси руханий байлыгыбызды өнүктүрүү зарыл экендигине токтолду. Кызматкерлерди тарбиялоодо академияда билимди жакшы берип, катуу талап болсо, практика жүзүндө кыйналбай жумуш алып барууга шарт түзүлөрүн айтты.

Жалпысынан алганда генералдар кыргыз милициясынын кадыр-баркын жогору көтөрүү жана элдин милицияга болгон ишенимин жогорулатууда ар бир кызматкерди талыкпастан эмгектенүүгө чакырышты. Андан сырткары Жалал-Абад облустук милициясы дайыма ийгиликке жетишкен, элге кызмат кылган элдик милиция болушуна тилектештигин билдиришти. Айрыкча милицияга ант берип жумушка киргенден кийин ак дилден кызмат өтөп эл үчүн, коомдук тартипти камсыздоодо мыкты иштеш керек жана кызматта өзгөчөлөнгөн кызматкерлерди сыйлоо зарылдыгын белгилешти.

Жолугушууда Жалал-Абад облустук ардагерлери тарабынан ИИМдин жетекчилигинин аларга ден соолугун чыңдоодо жана сыйлоо учурларында көңүл бурулушун сунушташып, жалпы милиция кызматкерлерине ден соолук жана ийгиликтерди каалашты.

Жыйынды аяктап жатып Октябрь Урмамбетов кызматкерлерди элдин арыз-даттанууларын чечүүдө мыйзамдуулукту сактоого чакырып, кызматкерлердин күжүрмөн, кесиптик даярдыгы жогорку деңгээлде болуп, жетекчилик өздүк курамдын иштөөсүнө шарт түзүү менен биргеликте заман талабына ылайык иш алып баруу зарылдыгын жана Мекен, эл үчүн ак дилден, чынчылдык менен иштөө ар бир кызматкердин милдети экендигин баса белгиледи.

Жыйындан соң генералдар клубунун төрагасы баштаган топ Жалал-Абад ОИИБдин кызмат учурунда каза болгон кызматкерлердин  эстелигине келишип гүл чамбар коюшуп, куран окулуп, эскерүү зыйнатын өткөрүштү.