1,992 Бардыгы /

Урматтуу энелер, кымбаттуу эже-карындаштар! Сиздерди 8-март-Аялдардын эл аралык майрамы менен чын жүрөктөн куттуктайм! Силер эл-журтубуздун кутусуңар, бизди сыймыкка бөлөп, ар дайым шыктандырып турасыңар. Жаркыраган жаздын жылуу илеби менен кошо келген майрам күнү жүзүңөргө жылмаюу тартуулап турсун, жакындарыңардын мээрими менен камкордугу курчап турсун! Кыргыз айымдары ар дайым эмгекчил жана чыдамкай болуп келген. Ошол эле учурда назик жана сулуу. Жыл сайын жаркыраган жаз менен кошо келген бул майрам баарыбызга көтөрүнкү маанай тартуулайт. Элибизде эзелтен кыз баласын дайыма төргө чыгарып, өзгөчө урмат-сыйга бөлөп келген. “Кыздын кырк чачы улуу” деген нуска сөз ар бирибиздин аң-сезимибизге терең ширелген. Жергебизде тынчтыктын өкүм сүрүшүндө, жашоо-турмуштун бир нукка түшүп, өнүгүүгө карай бурулушунда сиздердин эмгекке баа жетпейт, асылкеч аялдар!

        Аялзаты -эне, жашоо башаты, үйдүн куту. Бүгүнкү күндө да айымдарыбыз бала тарбиялап, үй-бүлө түйшүгүн тартып, келечек муундарга адеп-ахлактык баалуулуктарын жайылтып келет. Айымдар дээрлик бардык тармактарда эмгектенип, өздөрүн сынап, ийгиликтерди багынтууда. Заман талабына ылайык эркектер менен тең тайлаша турмуш жүгүн артып, бир эле учурда коомдо да активдүү. Мамлекеттин тынчтыгы, өсүп-өнүгүүсүндө илим-билимдүү жаратман айымдардын салымы чоң. Өлкөдөгү тынчтык, жакындардын амандыгы, үй-бүлөдөгү бакыбаттык – сиздерге улуу белек. Сиздер күн сайын белек алууга, урмат-сыйга бөлөнүүгө татыктуусуздар.

Кадырлуу айымдар! Баарыңыздар бекем ден соолукта болуңуздар! Ар дайым жүзүңүздөрдөн жылмаюу кетпесин! Үй-бүлөңүздөргө тынчтык, бакубат турмуш каалайм!

Абсаттар СЫРГАБАЕВ, Кыргыз Республикасынын Президентинин Жалал-Абад облусундагы ыйгарым укуктуу өкүлү