1,020 Бардыгы /

ЖАЛАЛ-АБАД. Кечээ, 4-майда Жалал-Абад шаардык мэриясынын муниципалдык менчик башкармалыгы шаар аймагындагы муниципалдык жерлердин, мүлктөрдүн, айыл чарба багытындагы жерлерди кайра бөлүштүрүү фондунун (ФПС) жерлеринин, ошондой эле, “Жеңиш”, “Токтогул”, “Нооруз” жана “Экопарк” эс алуу бактарындагы жерлердин ижара акысын учурдагы инфляциянын өсүшүн эске алуу менен 50%дан 100%га чейин жогорулатуу боюнча  коомдук угуу өткөрдү.

Жалал-Абад шаардык мэриясынын маалымат борбору билдиргендей, коомдук угуу Жалал-Абад шаардык кеңешинин төрагасы Н.Орозбаев, мэрдин биринчи орун басары Кубанычбек Иманалиев, шаардык кеңештин депутаттары, Муниципалдык менчик башкармалыгынын башчысы Жолдубай Бөрүкулов,  ижарачылар, шаар тургундары катышты.

Муниципалдык менчик башкармалыгы шаардагы муниципалдык жерлердин ижара төлөмдөрү  2015-жылдан бери көтөрүлө электигин белгилеп, маяналардын, башка төлөмдөрдүн көтөрүлгөндүгүн эске алып, бюджетти көтөрүү максатында учурдагы ижара акыларды 50%дан 100%га чейин жогорулатууну сунуштады. Ага ылайык, учурда  муниципалдык жерди иштетип жаткан ижарачылар бир чарчы метр жер аянтына ай сайын 19 сомдон ижара акы төлөп келген болсо, сунушталган жаңы тариф боюнча бир чарчы метрге ай сайын 38 сомдон төлөнөт.

Коомдук угууда талаш- тартыш пикирлер жаралып, бир катар сунуштар ортого салынды. Жыйынтыгында жыйынга катышкан депутаттар, ижарачылар тарабынан сунуш колдоо тапкан жок.

Белгилей кетсек, учурда 900дөй ижарачы муниципалдык жерлерди жана имараттарды  ижарага алып иштетип келет.