1,134 Бардыгы /

          ЖАЛАЛ-АБАД. Жалал-Абад облусуна караштуу Аксы районунун борборундагы «Кербен» аба майданынын аэродромунда жакынгкы күндөрдө оңдоп-түзөө жана кайрадан калыбына келтирүү жараяны  жүргүзүлөт.

          «Кыргызавтожолу» мамлекеттик мекемесинен билдиришкендей, ушул тапта чуңкур кесүүгө жана аң-чөнөктөрдү жамоого даярдык иштери кызуу жүрүүдө. Аэродромдун учуу-конуу тилкесине, учактын токтоочу жайларына жана башка бөлүктөрүнө дагы толук бойдон асфальт төшөлөт.

          Аталган мекемеден кошумчалашкандай, бул аткарыла турган иш-чаралар башынан аягына дейре транспорт жана коммуникациялар министри Тилек Текебаевдин такай көзөмөлүндө болот. Белгилей кетчү жагдай: ушул тапта «Талас» аба майданынын аэродромунда оңдоо жана калыбына келтирүү иштери абдан кызуу жүргүзүлүүдө.Анткени, президент Садыр Жапаровдун жеке демилгеси аркасынла Улуттук өнүктүрүү программасынын алкагында аймактардагы аба майдандарынын инфратүзүмүн жакшыртуу жана ички авиакаттамдарды мурункудай калыбына келтирүү боюнча бир катар иш-чаралар белгиленген.

          Ошентип, бара-бара «Ысык-Көл», «Каракол», «Нарын», «Ош» жана «Жалал-Абад» абай майдандарын заман талабына жараша реконструкциялоо пландаштырылууда, Ал эми Талас облусунда аба майданы ишке киргизилет, «Баткен» жана «Казарман» аба майдандарынын аэродромдорунун элементтеринин оңдоо-калыбына келтирүү иштери ушул тапта абдан кызуу жүрүүдө.

Алишер ТОКСОНБАЕВ, өз кабарчы