624 Бардыгы /

          ОШ. Өзгөчө кырдаалдар министрлигине караштуу өзгөчө кырдаалдарга мониторинг жүргүзүү департаменти Кыргызстандын аймагында табигый кырсыктардан жапа чегиши ыктымал аймактарды дагы терең изилдейт. Бул туурасында Өзгөчө кырдаалдар министрлигинин басма сөз кызматынан ачыкташты.

Баса,  табигый кырсыктардын арасынан сел жана суу ташкындары эң көп зыян алып келген. Бир жылда эле жетимиштен ашуун ирет сел жүргөн, анын алтоо өзгөчө кырдаал деп катталган. Аталган министрлик изилдөөнүн негизги максаты селдин алдын алуу, табигый кырсыктарды болтурбоо жана алдын ала баалоо экендигин баса белгиледи. Баса, август айынын биринчи он күндүгүндө өлкө аймагында ондон ашык катуу сел катталды. Селден Түп, Жети-Өгүз райондору жана Ысык-Көл облусунун Чолпон-Ата шаары, Жалал-Абад облусунун Аксы, Базар-Коргон жана Ала-Бука райондору, Баткен району өзгөчө жапа чегишти.

А буга чейин өзгөчө кырдаалдар министри Бообек Ажикеев Кыргызстанда жыл сайын 400 чакты табигый кырсык катталарын Дүйнөлүк банктын Аксель Ван Троценбург баштаган өкүлдөрү менен жолукканда дагы билдирген. Кыргызстанда төрт миңге чукул үй-бүлө дагыле кооптуу аймакта жашашат жана алардын басымдуу бөлүгү Ош менен Жалал-Абад облустарына жансакташат.

Алишер ТОКСОНБАЕВ, өз кабарчы