735 Бардыгы /

БАТКЕН. Баткен облусуна караштуу Баткен районунун Чек айылында коомдук алдын алуу борбору пайдаланууга тапшырылды. Бул жөнүндө Баткен облустук милициясынан билдиришти.

Маалыматка караганда, коомдук алдын алуу борбору Ички иштер министрлигинин жана «Эл аралык толеранттулук үчүн» коомдук фонду жана Saferworld уюму менен кызматташтык долбоорунун жана АКШнын Кыргызстандагы элчилигинин колдоосунун астында «Милиция менен элдин ортосундагы социалдык кызматташтык»  долбоорунун алкагында ачылды. Бул аземге Баткен облустук мамлекеттик акимчилигинин жана Баткен облусунун ички иштер башкармалыгынын өкүлдөрү, жергиликтүү мамлекеттик ишканалардын жетекчилери, милиция кызматкерлери, ошондой эле жергиликтүү жашоочулар катышышты.

Бул коомдук алдын алуу борборунда аксакалдар соту, аялдар кеңеши ошондой эле жаштар координаты милициянын участкалык тескөөчүлөрү менен биргеликте жарандардын арыз-даттанууларын кабыл алышып, туруктуу иш алып барышмакчы. Коомдук алдын алуу борборунун ар бир мүчөлөрүнө өз алдынча иш бөлмөлөр дагы каралып, заманбап техника жана дагы эмеректер менен камсыздалды. .

«Милиция менен элдин ортосундагы социалдык кызматташтык»  долбоорунун алкагында аталган борбордун капиталдык курулушуна 400 миң сом, компьютердик жабдуулар, кеңсе эмеректери менен камсыз кылууга 329 миң 361 сом сом каржылык жардам көрсөтулдү. Ал эми Дара айыл өкмөтү тарабынан курулуш иштерине 1 миллион 543 миң сом сарпталды.

Алишер ТОКСОНБАЕВ, өз кабарчы