846 Бардыгы /

     ОШ. Орусия-Кыргыз өнүктүрүү фонду Ош облусунун Алай районундагы Гүлчө дарыясына чакан гидроэлектр станциясын курууга 4,2 миллион доллар бөлүүнү пландаштырып жатат.

        Фонддун маалыматына караганда, аталган долбоорду “Алай Гидро” ЖЧКсы жүзөгө ашырат. Кубаттуулугу 9 мегаватты түзгөн заманбап жаңы ГЭС Алай районунун электр энергиясына болгон муктаждыгын 86 пайыз камсыз этмекчи. Станцияда заманбап жогорку технологиялык жабдуулар колдонулат.

      Орусия-Кыргыз өнүктүрүү фондунун башкармалыгынын төрагасы Артем Новиков баса белгилегендей, акыркы эки жылда бул гидроэнергетика чөйрөсүндө фонддун колдоосу аркасында өлкөдө жүзөгө ашырылып жаткан сегизинчи долбоор. Алардын жалпы кубаттуулугу 153 мегаватты түзөт. Бул жылына дээрлик 600 млн киловатт-саат электр энергиясы дегенди туюндурат. ГЭС боюнча долбоорлордун жалпы наркы 183,6 миллион долларга бааланып, анын 39 пайызы– 72 миллион доллары аталган фонд тарабынан каржыланат.

         Ошентип, ар бир энергетикалык долбоор өлкөбүздөгү энергетикалык тартыштыкты кыскартуу менен гана чектелбестен, өндүрүш кубаттуулугун дагы ого бетер арттырууга, ошондой эле жаңы жумуш орундарын түзүүгө гана жардам бермекчи.

           Алишер ТОКСОНБАЕВ, өз кабарчы