864 Бардыгы /

          ОШ. Ош облусунун Кара-Кулжа районундагы Кулун-Ата мамлекеттик жаратылыш коругуна, ошондой эле Өзгөн районунун Кара-Шоро мамлекеттик жаратылыш паркына жана булардын аймагынан тышкаркы жактарга дагы атайын коюлган фототузактарга жапайы жаратылыштагы айбанаттардын 18 түрү түшкөндүгү аныкталды. Бул туурасында Табиятты коргоо боюнча иш алып барып жаткан NABU-Kыргызстан Эл аралык коомдук уюмдун маалымат кызматынан кабарлашты.

        Маалыматка караганда. NABU-Kыргызстан Эл аралык коомдук уюмунун өкүлдөрү жогоруда аталган аймактарга 2022-жылдын август-сентябрь айларында фототузактарды коюп келишкен. Аны 2023-жылдын июль айында кайра чечип келишип, аппарат тартып калган 12 миңдей фотону тереё анализ кылышкан. Жалпысынан экспедициялык сапар ийгиликтүү болуп, жаратылышты байырлаган жапайы жаныбарлардын бир канчасы фототузактарга түшкөндүгү ашкереленди.

        Ошентип, жыйынтыгында жапайы айбанаттардын илбирс, аркар, аюу, эчки-теке, карышкыр, сүлөөсүн, түлкү, кашкулак, коён, кызыл суур, таш суур, суусар, бүркүт, таз жору, улар, кеклик сыяктуу жана башка түрлөрү түшкөнү белгилүү болуп, жалпысынан алардын 18ден ашык түрү аныкталган. Кошумчалай кетээрибиз: NABU-Kыргызстан Эл аралык уюму өлкөдө 10 жылдан бери жаратылышты, анын ичинен ак илбирсти коргоо максатында иш алып барат. Алар өлкөнүн 80ден ашык жерине фототузактарды коюшкан. Ушул тапта аларда дагы тартым иштери кызуу жүрүүдө.

           Алишер ТОКСОНБАЕВ, өз кабарчы