687 Бардыгы /

Жалал-Абад облусуна караштуу Кочкор-Ата шаарынын тургуну, «Бүтүн Кыргызстан» партиясынын мүчөсү Чыныгүл Шеркуловага Жалал-Абад шаардык соту өкүм чыгарып, аны 3 жылга абакка кесип, бирок, жашы 14кө чыга элек кызына байланыштуу жазаны аткаруу мөөнөтүн жылдырды. Мындай чечим өткөн жылы 14-декабрда эле чыккандыгын Жалал-Абад облустук сотунун басма сөз катчысы Мирлан Төрөмаматов эми гана шардана кылды.

          Маалыматка караганда, Чыныгүл Шеркулова Кылмыш-Жаза Кодексинин 327-беренеси (Бийликти күч менен басып алууга ачык чакырыктар) менен күнөлүү деп табылган. 44 жаштагы Шеркулованы 2023-жылы октябрь айында УКМКнын кызматкерлери кармагандыгы белгилүү. Жактоочусу Токтосун Жоробеков Чыныгүл Шеркулова «Бүтүн Кыргызстан» партиясынын мүчөсү экенндигин, депутат Адахан Мадумаровду колдоп келгендигин жана «Алтын-Мазардын айланасында сөз чыгарып, элге чакырык жасады» деген айып менен кармалгандыгын айтканы бар. Бирок, анын кармалышы туурасында УКМК азырынча расмий маалымат бере элек.

          Кыргызстанда буга дейре дагы социалдык тармактын колдонуучулары жарыялаган билдирүүлөрү үчүн ар кандай айып менен камалышкан. А түгүл Таш-Көмүр шаарынын 70 жаштагы тургуну, пенсионер Салия Таштановага Фейсбукта айткан пикири үчүн айып тагылып, 50 миң сом айып пул дагы салынган.

Алишер ТОКСОНБАЕВ, өз кабарчы