438 Бардыгы /

          Жаңыдан ант беришкен АКШнын Тынчтык Корпусунун жети адис-ыктыярчылары Нарын, Ысык-Көл, Жалал-Абад, Ош жана Чүй областарында эко-туризм маркетинги боюнча адис катары бир жылдык ишин башташты. Булар Коомчулукка негизделген Кыргыз туризм Ассоциациясындагы өнөктөштөрү менен жаратылышка негизделген турларды жеринде иштеп чыгууга, ички жана эл аралык туристтерди кеңири тартуу максатында натыйжалуу маркетинг стратегияларын түзүүгө, туризмдин Кыргыз Республикасынын жергиликтүү экосистемасына тийгизген таасирин минималдаштыруу үчүн колдонмолорду жазууга жана эң мыкты иш-чараларды байма-бай уюштурууга, ошондой эле  жергиликтүү өнөктөштөрүнүн англис тилинде сүйлөөсүн дагы жакшыртууга жардамдашышат.

          Баса, америкалык адис-ыктыярчылар ант берүү алдында Кыргыз тилине жана маданиятына басым жасалган эки жумалык таанышуу тренингин дагы аякташты.      АКШнын Тынчтык Корпусу климатка жана айлана чөйрөнү коргоого  багытталган жаңы программаларынын алкагында Коомчулукка негизделген Кыргыз туризм Ассоциациясы менен болгон кызматташуусун 2023-жылдын апрель айынан тартып баштаган. Аталган салтанатка Америка Кошмо Штаттарынын Кыргыз Республикасындагы элчиси Лесли Вигери, Кыргыз Республикасынын Туризм департаментинин директорунун орун басары Кыял Кенжематова жана жергиликтүү туристтик компаниялардын өкүлдөрү дагы катышышты.

• Дээрлик отуз 30 жыл бою ыктыярчылар, ошондой эле алардын

жамааттары билимди жана көндүмдөрдү өнүктүрүү жана Кыргыз Республикасы менен Америка Кошмо Штаттарынын элинин ортосундагы достукту жана өз ара түшүнүшүүнү илгерилетүү үчүн тыгыз кызматташып келатат. Бул Программа аркылуу АКШнын Тынчтык Корпусунун ыктыярчылары коомчулукка негизделген туристтик ассоциациялар менен бирге экологияны сактаган, жергиликтүү экономикалык өнүгүүгө дагы өзгөчө өбөлгө түзгөн жана жашыл экономиканы чыңдаган туризмди илгерилетүү үчүн абдан активдүү иштешет, – деди АКШнын Кыргызстандагы элчиси  Лесли Вигери.

          Айтмакчы, АКШнын адис-ыктыярчылары ушул тапта Кыргызстанда кызмат өтөп жатышкан 35 англис тилин окутуу боюнча ыктыярчылардын катарын дагы толукташып, ыктыярчылардын жалпы санын 42ге жеткиришти. Кыргыз Республикасындагы Тынчтык Корпусунун Эко-туризм боюнча программасы АКШнын Тынчтык Корпусунун Европа, Азия жана Жер Ортолук деңиз аймагында бул биринчи Программа болуп саналат. Бул өз ордунда Кыргыз Республикасыдагы Тынчтык Корпусунун климатка багыттылган иш-аракеттерге көңүл буруусун даана чагылдырып турат.

Алишер ТОКСОНБАЕВ, өз кабарчы