525 Бардыгы /

ЖАЛАЛ-АБАД. Учурда элет жеринде кыз–келиндер айыл чарба кооперативдерин түзүшүп, элеттин экономикасын көтөрүү маселесин алдыга коюшууда.

Айыл чарба продукцияларын кайра иштетүү менен үй-бүлөлүк кирешени көбөйтүү жана жаңы жумушчу орундарын түзүү элет жериндеги активдүү кыз-келиндердин негизги максаты. Атап айтсак, Ноокенрайонундагы «Өнөр-Кенчи» кооперативи койдун жүнүн кайра иштетүү менен алектенсе, Аксы районундагы «Жаңы-Жол асылдары» кооперативи мөмө-жемиштерди консервациялап, элге табигый таза компот, кыямдарды сунуштап жатышат. Ал эми Базар-Коргон районундагы “Сейдикум-Био” кооперативи дыйкандарга органикалык жер семирткичтерди (биогумус) даярдап сунуштаса, «Базар-Коргон айымдары» кооперативи чебер аялдарды бириктирип, ишкана ачышкан.

Жогорудагы кооперативдердин туруктуу иштешине түрткү берүүчү негизги маселелердин бири-бул бухгалтердик учет жана салыктык төлөөлөрдү так жүргүзүү болуп эсептелет.  Кооперативдерге жардам көрсөтүү максатында «Абад» коомдук фонду тарабынан «Кооперативдердеги бухгалтердик учет жүргүзүүнүн жана салык төлөөнүн негиздери» темасында 2 күндүк окуу-тренинг өткөрүлдү. Иш-чара негизинен учурдагы мыйзамдардын алкагында бухгалтердик учет, отчет жана салыктарды төлөөнү туура жүргүзүүгө багытталган.  Бул  окуу-тренинг  «Абад» коомдук фонду ишке ашырып жаткан жана Кыргыз Республикасындагы АКШ Элчилиги тарабынан каржыланган «Элет аялдарынын демилгеси менен жергиликтүү экономиканы өнүктүрүү» долбоорунун  алкагында өткөрүлдү.

Узакбай МАМАТКУЛОВ, Жалал-Абад шаары