444 Бардыгы /

ЖАЛАЛ-АБАД. Сузак райондук өзгөчө кырдаалдар бөлүмүнүн №65 өрткө каршы куткаруу бөлүгүнүн жаңы имараты курулуп, пайдаланууга берилди.

Иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев, Өзгөчө кырдаалдар министри Бообек Ажикеев, Кореянын Кыргызстандагы элчиси Ли Вон Чже, ПРООНдун туруктуу өкүлү Александра Соловьева, райондук өзгөчө кырдаалдар бөлүмүнүн өздүк курамы, жергиликтүү бийлик жана тургундар катышты.

Сузак айылындагы өрткө каршы күрөшүү бөлүгүнүн имараты 1954-жылы курулуп, эскилиги жеткендиктен, 2018-жылы кооптуулугу боюнча атайын корутунду чыгарылган. Анын натыйжасында Сузак райондук мамлекеттик администрациясы тарабынан жаңы имарат курууга жер аянты ажыратып берилген.

Имаратты куруу демилгеси Корея Республикасынын “КОЙКА” агенттигинин “Калктын өрт коопсуздугун жогорулатуу жана өрткө каршы куткаруу кызматтарынын мүмкүнчүлүгүн бекемдөө” долбооруна сунушталып, колдоо тапкан.

Облус башчысы калкынын саны боюнча республикадагы экинчи ири район болгон Сузак районунун борборунда өрткө каршы куткаруу кызматынын жаңы имаратын куруу, анын техникалык базасын чыңдоо муктаждыгы абдан чоң болуп келгенин белгиледи.

Жаңы имарат, алынган техникалар өрт кырсыктарынын алдын алуу, жарандардын өмүрүн сактоо жана элдин коопсуздугу үчүн кызмат кылаарын кошумчалап, демөөрчүлөргө ыраазычылык билдирди.