411 Бардыгы /

          Ош мамлекеттик педагогикалык университетинин (ОшМПУнун) педагогикалык колледжинде өрттүн алдын алууга жана аны өчүрүүгө багытталган окуу жана машыгуу жараяны уюштурулду.

Окуу жайдан редакциябызга билдиришкендей, аталган иш-чара Өзгөчө кырдаалдар министрлигинин Ош шаары боюнча башкармалыгы менен биргеликте уюштурулуп, ага аталган башкармалыктын тийиштүү кызматкерлери, тез жардам дарыгерлери, өрт өчүрүүчүлөр жана окуу жайдын жалпы окутуучулар, ошондой эле студенттер катышышты. Машыгуунун жүрүшүндө чоң жыйындар залында атайын өрт чыгуу уюштурулуп, жалпы 1500 адамды имараттан эвакуациялоо иштери жүрдү. Ошондой эле имараттын ичинде калып калган адамдарды куткаруу иштери жүрүп, куткаруучулар эшик, терезе, чатыр аркылуу алып чыгуу жолдорун жана биринчи медициналык жардам көрсөтүү ыкмаларын практикалык түрдө аткарып, түшүндүрүп беришти.

Ошентип, ОшМПУдагы өрттүн алдын алууга жана аны өчүрүүгө багытталган окуу жана машыгуу жараянында анын жалпы катышуучуларына өрт чыккан учурда сактануу жолдору, алгачкы жардамдарды көрсөтүү, биринчи өрт өчүрүүчү каражаттарды туура колдонуу боюнча бардык аракеттерди айкын айтылып, даана көрсөтүлдү.

Алишер  ТОКСОНБАЕВ, өз кабарчы