312 Бардыгы /

ЖАЛАЛ-АБАД. Бүгүн Кыргыз Республикасынын Президентинин Жалал-Абад облусундагы ыйгарым укуктуу өкүлү Абсаттар Сыргабаев спорттун грек-рим күрөшү боюнча балбаны Амантур Исмаилов менен жолугушуп, быйыл Парижде өтүүчү жайкы олимпиада оюндарына катышуу жолдонмосун утушу менен куттуктады.

Ал 21-апрелде Бишкектеги Арена спорт комплексинде өткөн Олимпиада оюндарына жолдомо бере турган Азиянын лицензиялык мелдешинде 67 кг салмакта лицензия үчүн кытайлык Хусиету Хусиетини 9:1 эсеби менен утуп, Кыргызстанга олимпиада оюндарына 9-жолдомону алып берген.

Ыйгарым укуктуу өкүл спортчунун жараткан ийгилиги менен куттуктап, бул көрсөткүч облустун спорт тармагындагы чоң жетишкендиги экенин белгиледи.

Ошондой эле Жалал-Абад шаарындагы Раатбек Санатбаев атындагы олимпиадалык резервдеги балдар өспүрүмдөр спорт мектебинин директору, спортчунун машыктыруучусу Чынгыз Пиримкуловго да ыраазычылык билдирип, оюндарга катышууда ар тараптуу колдоо көрсөтүлөөрүн айтты.

Эске салсак, Олимпиада оюндары быйыл 24-июлдан 11-августка чейин Франциянын борбору Парижде өтөт.