441 Бардыгы /

        Өзгөчө кырдаалдар министрлиги Ноокат районундагы сегиз кишинин өмүрүн кыйган селдин себептерин изилдеп, а түгүл жыйынтыгын дагы чыгарды. Бул туурасында аталган мамлекеттик мекеменин басма сөз кызматынан кабарлашты.

        Кырсыктын негизги себептери сыңары аномалдуу жамгыр, Абшыр-Ата дарыясында узак жылдардан бери чоң сел болбогондуктан жээгинде дарактардын өсүшү жана эс алуу тапчандарынын башаламан курулуусу, көмүр карьерине өтүүчү көпүрөнүн төмөн экендиги баса белгиленди.

Өзгөчө кырдаалдар министрлиги тыкыр изилдөөнүн жыйынтыгында кырсыктын кесепеттерин жоюу жана алдын алуу максатында Ноокат райондук акимчилигине бир катар сунуштарды кошо берди. Анда ички чарбалык жолдорду сөзсүз кайрадан калыбына келтирүү, 2018-жылы курулган көпүрөнү капиталдык оңдоо жана дарыянын жээктерин бекемдөө, таза суу түтүктөрүн калыбына келтирүү сыяктуу сунуштары камтылган.

Ноокат районундагы №37-Жол тейлөө мекемесине Кулатов-Абшыр-Сай жолундагы сел калдыктарын ыкчам тазалоо, көпүрөлөрдү оңдоп-түзөп, андан ары бекемдөө жана Кызыл-Кыя көмүр ишканасынын Абшыр-Сай дарыясына курган көпүрөнүн ордуна атайын долбоор менен көпүрө салуу сунуш этилди. Ушул тапта Өзгөчө кырдаалар министрлиги Ноокатта сел каптаган үйлөрдү катарынан тазалап жатат. Маалыматка караганда, Насирдин Исанов айыл өкмөтүнүн Тескей-Кожоке айылында 25 турак үйдүн коро сарайларына, мектепти суу каптаган. Ноокат районундагы селден Гулистан айыл өкмөтүндө үч үйдү, жана дагы төрт үйдүн короо жайын суу каптаган. Төрөбай Кулатов айыл өкмөтүнүн Абшыр-Ата айылында, Көк-Жар айыл өкмөтүнүн Жийде, Ак-Өтөк айылындагы сел жүргөн сайларды техника менен тазалоо улантылып жатат.

Ошентип, Ноокат районунда сел сегиз кишини жалдмап тынды. Ал эми жума күнү кечке маал жүргөн табигат кырсыгынын кесепетинен Абшыр-Ата эс алуу жайынын жогорку тарабында калып кеткен 1300дөй киши коопсуз жерге көчүрүлдү. Ноокат районунда өзгөчө кырдаал жарыяланды. Өзгөчө кырдаалдар министрлиги 28-июндан 2-июлга чейин нөшөрлөгөн жаан күтүлүп жатканын маалымдап, сел жүрүү коркунучу бар экенин улам эскертип жатат.

Алишер ТОКСОНБАЕВ, өз кабарчы