54 Бардыгы /

Бүгүн Кыргыз Республикасынын Президентинин Жалал-Абад облусундагы ыйгарым укуктуу өкүлүнүн орун басары Максат Сыдыков, облус башчысынын атынан Сузак районунун Багыш айыл аймагынын Октябрь айылында жайгашкан карылар үйүнө барып, андагы улгайган жарандарды 1-октябрь — Эл аралык карылар күнү менен куттуктады.

Максат Сыдыков эзелтен карыларды урматтоо жана сыйлоо кыргыз элинин маданиятынын ажырагыс бөлүгү болуп саналаарын айтып, социалдык-стационардык мекеменин жашоочулары ар дайым мамлекеттин камкордугу астында экенин белгиледи.

Ал ошондой эле, майрамга карата ыйгарым укуктуу өкүлдүн резервдик фондунан бөлүнгөн акча каражатын жана белектерди тапшырды. Мындан сырткары карылар үйүндө түзүлгөн шарттар менен таанышып чыкты.

Белгилей кетсек, Сузак районунун Багыш айыл аймагынын Октябрь айылында жайгашкан карылар үйүндө 98 улгайган жана ден соолугунан мүмкүнчүлүгү чектелген жарандар жашап келишет.

Майрам алкагында облус башчысынын резервдик фондунан Токтогул районундагы “Кара-Каш” улгайган адамдардын социалдык-стационардык мекемесине да акча каражаты ажыратылган.