3 Бардыгы /

Бүгүн, 18-октябрда Жалал-Абад облусунун Чаткал районунун Ак-Сай тоосунда дайынсыз жоголгон алты жаранды издөөгө тик учак тартылды. Тик учак Ош шаарынан учканын Өзгөчө кырдаалдар министрлигинин маалымат кызматы кабарлады. 

Мекеменин маалыматына ылайык, издөө иштерине 20 куткаруучу тартылып, зарыл болгон бардык техникалык жабдуулар колдонулууда. 

9-октябрь күнү Каныш-Кыя айылынын тургундары жана чет элдик бир жаран (жалпы 14 адам) эндик өсүмдүгүнүн тамырын издөөгө тоого кеткенден кийин дайынсыз болуп жаткан. 16-октябрда алардын сегизи аман-эсен табылган. Ал эми ӨКМге калган алты киши кар көчкү алдында калышы мүмкүн деген маалымат берилген. 

Эндик – сейрек кездешүүчү жана кызыл китепке кирген өсүмдүк. Тамыры жоон болуп, тик өсөт. Кызыл боёгу болгондуктан косметикалык каражат катары колдонулат. Кыргызстандын тоолорунда анын үч түрү бар.