12 Бардыгы /

        Ош облусуна караштуу Кара-Суу районундагы 242 миллион 50 миң сомдук жер тилкеси мамлекеттин балансына кайтарылды. Бул туурасында Башкы прокуратуранын басма сөз кызматынан кабарлашты.

        Маалыматка караганда, транспорт прокуратурасы текшерүү жүргүзүп, анда «Кыргыз темир жолу» мамлекеттик ишканасынын Түштүк бөлүмүнө караштуу Кара-Суу бекетинин имараттары жайланышкан жана ага тийиштүү жалпы 10 443,5 м2 түзгөн жер тилкелеринин тастыктоочу документтери жок, мамлекеттик менчикке алынбай келгендиги аныкталды. Аталган ишкананын Түштүк бөлүмүнүн жетекчилигине укуктук бузууларды жоюу актысынын негизинде, жер тилкеси мамлекетке өткөрүлдү.

        Улуттук коопсуздук боюнча мамлекеттик комитетинин буга чейинки маалыматына ылайык, соңку үч жылдан бери ондогон мүлктөр мамлекетке жана муниципалдык менчикке кайтарылды. Анын көбү базарлар, автобекеттер жана жер тилкелери.

Алишер ТОКСОНБАЕВ, өз кабарчы