6 Бардыгы /

Бишкек – Ош автоунаа жолунун Төө-Ашуу жана Ала-Бел ашуу тилкелерине кар күрткүсүнөн коргоочу атайын тосмолор катарынан орнотулду. Бул туурасында Транспорт жана коммуникациялар министрлигинен билдиришти.

        Маалыматка караганда, иш-чаранын салтанаттуу ачылышы өткөрүлүп, ага транспорт министринин орун басары Бекназар Базаралиев, Жапониянын Кыргызстандагы элчиси Хидэки Года, Жапониянын эл аралык кызматташтык агенттигинин (JICA) өкүлдөрү жана Жогорку Кеңештин депутаттары катышты.

        Кыргыз Республикасынын Транспорт министринин орун басары Бекназар Базаралиев аталган долбоордун абдан маанилүүлүгүн баса белгилеп, аны жүзөгө ашырууда көмөк көрсөтүшкөн бардык тараптарга терең ыраазычылыгын билдирди. Белгилей кетчүү жагдай: “Бишкек – Ош жолун кар күрткүсүнөн коргоо” долбоору Жапон эл аралык кызматташтык агенттигинин (JICA) гранттык колдоосу аркасында жүзөгө ашырылды. Атайын тосмолор жолдун 125-129-чакырымдар аралыгына (Төө-Ашуу) жана 216-222-чакырымдар аралыгына (Ала-Бел) коюлду. Жолдун коопсуздугун жана үзгүлтүксүз иштөөсүн камсыз кылуу максатын көздөгөн долбоордун алкагында Төө-Ашууга жалпы узундугу 2008 метр, ал эми Ала-Белге 3980 метр, бийиктиги 3-4 метрлик тосмолор дагы орнотулду.

        Эске салаарыбыз: былтыр JICAнын колдоосу аркасында Бишкек-Ош автоунаа жолунун 246-чакырымында кардан коргоочу галереянын курулушу аяктап, пайдаланууга тапшырылган. Жол каттамын жакшыртуу максатында Кыргызстандагы автомобилдик ташууларды, логистиканы жана жол кыймылынын коопсуздугун камсыздоого өбөлгө болгон галереянын узундугу 460 метр, ал эми бийиктиги 8,6 метр, туурасы 10,5 меитрди түзөт.

        Алишер ТОКСОНБАЕВ, өз кабарчы