6 Бардыгы /

Жалал-Абад шаарындагы Раатбек Санатбаев атындагы спорт мектеби толугу менен оңдоп-түзөөдөн өткөрүлөт. Бул тууралуу КРдинн Министрлер Кабинетинин төрагасынын орун басары – УКМК төрагасы Камчыбек Ташиев, Жалал-Абад шаарындагы Раатбек Санатбаев атындагы спорт мектебинин абалы менен таанышканда билдирди.

Жалал-Абад шаардык мэриясынын маалымат борбору маалымдагандай, шаардагы Раатбек Санатбаев атындагы спорт мектебинин имараттары 1969-жылы курулуп, учурда оңдоп-түзөөгө муктаж. Ал эми спортчулар көп болгондуктан кошумча имарат куруу да зарылчылыгы бар.

Камчыбек Ташиев спорт мектебинин бардык шарттары менен таанышып чыгып, тийиштүү жетекчилерге бул мекемени толугу менен оңдоп-түзөөнү жана боксчулар үчүн атайын спорт зал курууну, мектеп аймагын көрктөндүрүп, спортчулар үчүн зарыл болгон заманбап шарттарды түзүүнү милдеттендирди.

Оңдоп-түзөө жана курулуш иштери жакынкы күндөрү башталып, келээрки жылдын аягына чейин бүткөрүлүп, пайдаланууга берилмекчи.

УКМКнын төрагасы Раатбек Санатбаев атындагы спорт мектебинин жаш спортчулары менен баарлашып, аларга спорт менен талыкпай машыгып, Кыргызстандын желегин дүйнөгө желбиретип, мекенди сүйүү жана ага берилгендик менен кызмат кылууга умтулуу зарылдыгын, ал үчүн керек болгон шарттарды мамлекет толугу менен түзүп берүүгө бүгүнкү күндө мүмкүнчүлүгү жетээрин айтты. Ошондой эле жаш боксчулар менен бокс ойноп, дем күч берди.

Белгилей кетсек, аталган спорт мектебинде спорттун 5 түрү: эркин күрөш, грек-рим күрөшү, кыздар күрөшү, бокс жана футбол боюнча машыгуулар өткөрүлөт. Учурда аталган жайда 1000 бала машыгат.