3 Бардыгы /

          Чек араны биротоло делимитациялоо жана демаркациялоо ишинин жыйынтыгы аркасында  Тажикстанга өтүп жаткан Баткен районунун Достук айылынын элине Бужум айылына караштуу Чет-Булак жерлигинде турак жай комплексин куруу жараяны башталды. Бул туурасында Президенттин иш башкармалыгынан билдиришти.

Маалыматка караганда, ар бир турак жай үчүн 10 сотыхтан жер бөлүнүп, жалпысынан 179 үй курулат жана ар бири үч бөлмөдөн туруп, ар биринде баардык заманбап шарттар жаратылат. Курулушту күз айларына дейре бүтүрүү пландаштырылууда. Курулуш жараянына президенттин иш башкаруучусу Каныбек Туманбаев өзү старт берип, Кыргыз-Тажик чек арасын тактоого жергиликтүү элдин дагы салымы чоң экендигин шардана кылды.

Достук – район борбору Баткенден 40 чакырым алыстыктагы түндүк-батышта, Тажикстандын Исфара–Ворух жолуна жакын жайланышкан чакан айыл. Мындай жалпысынан 70 чакты турак жай бар. 2021-жылдагы чек ара жаңжалында он чакты үй дээрлик талкаланып, кайра курулган эле. Ал эми 2022-жылы дагы чек арадагы өз ара тирешүүдө айыл дээрлик толук бойдон талкаланып, атайын план менен кайрадан курулуп, түптөлгөн. Социалдык мекемелер, мектеп баары тең жаңыланган. УКМК төрагасы Камчыбек Ташиев Достук айылы Тажикстанга толук бойдон өткөрүлүп, Кыргызстан ага жараша жер жана айылдагы жаңы курулган үйлөргө кенемте катары Тажикстандан дагы 30 гектар жер алып жаткандыгын айтканы бар. Ушул жылдын 6-мартында Достук айылында жергиликтүү бийликтин өкүлдөрү менен эл жолугушкан. Анда айыл элин Баткен районунун Суу-Башы айыл өкмөтүнүн Бужум айылына караштуу Чет-Булак жерлигине көчүрүү чечимине биротоло токтолушкан. Ушул эле жыйында Достуктун айрым тургундары беш сотыхтан эмес 10 сотыхтан жер берүүнү суранышкан. Президенттин Баткен облусундагы ыйгарым укуктуу өкүлү Айбек Шаменов анда мамлекет жарандарына турак жай салып бербей тургандыгын айтып, элге абдан орой мамиле кылган. Бул окуядан кийин коомдо нааразычылык жаралып, президент Садыр Жапаров Айбек Шаменовго аргасыздан оозеки эскертүү гана жасаган. Жыйынтыгында элге 10 сотых жерге үй куруп берүү, 10 сотых тилке келечекте турак жай салганга жана дагы 10 сотых жерди айыл чарбага пайдаланууга бөлүп берүү чечими кабыл алынган.

Айтмакчы, үстүбүздөгү жылдын 13-мартында Бишкек шаарында Кыргызстан менен Тажикстандын мамлекеттик чек арасы жөнүндөгү келишимге эки өлкөнүн президенттери – Садыр Жапаров менен Эмомали Рахмон кол коюшту. Алар бул чек ара келишимин «тарыхый» деп баалашты.  

Ал эми расмий маалыматка караганда, Кыргызстан менен Тажикстандын ортосундагы мамлекеттик чек аранын жалпы узундугу 1006,84 чакырымга созулат. Булардын арасынан 519,9 чакырым чек ара сызыгы 2011-жылга чейин такталып, жазылып, өкмөттүк делегациялар биротоло бекиткен. А калган 486,94 чакырым тилкеси акыркы үч жыл ичинде гана такталды.

Алишер ТОКСОНБАЕВ, өз кабарчы