3 Бардыгы /

Коомдо ишкер айымдардын саны артып барат. Айымдар ишкердик чөйрөдө өздөрүнүн активдүүлүгүн көрсөтүп, бизнестеги орду жогорулап жатканын бардык чөйрөдөн көрүүгө болот. Кичи жана орто бизнести айымдар жакшы өздөштүрүп келишет. Негизи айымдар психологиялык жактан бизнестеги оорчулуктарга, атаандаштыкка чыдамдуу келишет. Ошону менен бирге бардык маселелерди бат, кылдат, акылгөйлүк менен чечүүгө жөндөмдүү. Мына ушундай сапаттарга ээ болгон айымдардын катарын Кайыргүл Ботобаева толуктайт. Бул айым учурда гүлдүн тульпан түрүн өстүрүү менен жаз айында облус калкын кардарларды тейлеп, өз биснесин өнүктүрүп иш жүргүзүп келет. Анда Кайыргүл айым менен бизнес чөйрөсүндөгү абал, андагы оош-кыйыштар тууралуу кеп кылсак.

– Кайыргүл айым, алгач өзүңүз жөнүндө айтсаңыз? Бул ишкердикти кантип баштап калдыңыз?

– Мен 39 жаштамын. 4 баланын энесимин. Жолдошум бар. Табиятымдан гүлгө жакынмын. Гүл өстүрүп бизнес кылып баштаганыма 2 жылдын жүзү болду. Мен гүлдүн бир эле жоогазын (тюльпан) түрүн тандап, аны пияз көчөтүн Голандиялык гүл менен иш жүргүзгөн сатуучулардан сатып алып, гидроконика (топурагы жок сууда) ыкмасы менен өстүрүүнү туура көрдүм.

Жоогазын гүл негизи башка гүлдөргө салыштырмалуу назик болот. Ошондой эле сезондук гүл болуп эсептелинет. Эрте жазга даярдап, сатууга чыгарып калам. Быйыл ошол жоогазын гүлдүн 17 сортун 4х7 болгон бөлмөдө жер төлөмө олтургуздум. Даанасына келсек 10 жарым миң түп эктим. Менин гүл багым жашаган үйүмдүн жер төлөсүндө. Учурда аталган гүлдөрүмдүн баарын сатып бүттүм, калган жок. Ар дайымкыдай 8-Март айымдардын майрамына карата сатылып бүтөт.

-Табиятынан назик жоогазын гүлүн өстүрүүнүн түйшүктөрүнө, ыкмаларына токтолуп өтсөңүз?

-Туура, жоогазын гүлү назик болот. Ага жаш баланы бапестеп карагандай эле көңүл коюп кароону талап кылат. Ар дайым температураны, нымдуулукту бирдей абалда сактоо зарыл. Туура эмес температурада калып калса, бат эле соолуп, ооруга учурап калат. Бул гүлгө жөн эле суу куюп турууга болбойт. Атайын өзүнүн витаминдери бар. Негизи башында сууда өсөт. Кийинчерээк өсүү процесси аяктап калганда витаминдер менен азыктандырып турамын. Ар бир нерсенин өзүнүн түйшүгү болот эмеспи. Бул иштин да өзүнө жараша түйшүгү бар. Албетте, мээнеттин артында жакшы ийгилиги да  жок эмес.

-Келечекте дагы кандай пландарыңыз бар?

-Албетте баштаган ишти аягына чыгаруу же өнүктүрүү максат болот. Биз негизи бул ишти эми эле баштагандыктан алгач дааналап сатуу менен эле максатталган. Бирок, кардарларыбыз Жалал-Абад шаарынан эле эмес аймактардан, керек болсо Ош, Бишкек шаарларынан да кайрылуулар болуп, суроо-талап күчөп, кардарларыбыз көбөйүп, дүңүнө сатып алууну каалагандардын саны артты. Ошого байланыштуу кийинки жылга бул гүлдүн санын көбөйтүүнү максат койдук. Санын эле эмес, буйруса сапатынын үстүнөн да иштейбиз.

-Бизнес чөйрөдө атаандаштык болот. Учурда гүл өстүрүү менен алектенгендер көп. Алардан айырмачылыктарыңыздар барбы?

-Жалал-Абаддын гүл саткан дүкөндөрүндө биздин жоогазын гүлдөрдүн түрү жок. Болсо жоогазындын сары жана кызыл гана түстөрү кездешет. Атаандаштардан айырмабыз жоогазындын түрүндө. Башта айтып өткөндөй 17 түрү бизде гана бар. Бир гана өңү-түсүндө эмес, сапаты да артыкчылыкка ээ. Ошондуктан биздин гүлгө кардарларыбыздын суроо-талабы күч. Сатуучуларыбызга, кардарларыбызга жоогазындын түрүн тандоо менен бере алдык.

-Жеке ишкер катары мамлекеттен жардам ала алдыңызбы жана кандай салым кошо алдыңыз?

-Мен мамлекетке жаран катары үй-бүлөбүзгө тиешелүү болгон салыктарды убагында төлөө менен салым кошушум мүмкүн. Анткени гүл өстурүүдө ток, суу иштетем. Аларга болгон төлөмдөрдү төлөйм. Ал эми жеке ишкер катары мамлекеттен эч кандай жардам алганым жок. Негизи жардам болот дейт, бирок жеке капчыгыбыз менен эле иш баштаганбыз. Дагы мамлекетибиз, аймагыбыз үчүн ата мекендик өндүрүш десем туура болобу, билбейм. Өзүбүздө чет мамлекеттин гүлдөрүн өстүрүү да жакшы иш болсо керек.

-Аялдык бакыт эмне деп ойлойсуз?

-Бакыттын да өз жол чырагы болот. Кээде токтойбуз, кээде күтөбүз, кээде ошол бакыт менен бирге жолго чыгабыз. Аялдык бакытка жетелеген улуу күч бул махабат. Аял киши сүйгөнү менен үй- бүлө курса, бул жарык дүйнөгө бала алып келсе, балдарынын жанында болуусу канчалык улуу бакыт.

Маектешкен: Нургүл АБДЫЛДАЕВА, “Аймак”