15 Бардыгы /

Норвегиялык Хельсинки комитети менен Адам укугу боюнча эл аралык өнөктөштүк уюму (International Partnership for Human Rights – IPHR) Кыргыз бийлигин эркин журналист жана жарандык активист Канышай Мамыркулованы токтоосуз бошотуп, анын үстүнөн козголгон кылмыш ишин жабууга чакырды.

        – Канышай Мамыркуловага каршы репрессиялык иш Кыргызстандын Конституциясы жана Кыргызстан ратификациялаган Жарандык жана саясий укуктар боюнча эл аралык пакт менен кепилденген сөз эркиндигин жана ЖМК эркиндигин бузат, – деп айтылат Норвегиялык Хельсинки комитети менен Адам укугу боюнча эл аралык өнөктөштүк уюмунун кайрылуусунда.

Баса,Бишкек шаардык ички иштер башкармалыгынын кызматкерлери Канышай Мамыркулованы ушул жылдын 20-мартында кармап кеишткен. Ал эми Бишкек шаарынын Свердлов райондук соту журналистти ушул жылдын 19-майына дейре камакта калтырган. Бишкек шаардык милициясы ага Фейсбуктагы баракчасына жазган билдирүүлөрүнө байланыштуу Кылмыш-Жаза Кодексинин 278-беренеси («Массалык башаламандыктар») жана 330-беренеси («Расалык, этностук, улуттук, диний же региондор аралык кастыкты (араздашууну) козутуу») менен айып таккан. Ал эми 21-мартта өлкөдөгү укук коргоочулар, активисттер, журналисттер президент Садыр Жапаровго, Улуттук коопсуздук боюнча мамлекеттик комитеттин (УКМК) төрагасы Камчыбек Ташиевге, ички иштер министри Уланбек Ниязбековго ачык кайрылуу жолдошкон. Анда журналистти камакта кармоо Конституцияда кепилдик берилген сөз эркиндигине, адам укуктарына каршы келээри айтылган. Анын үстүнө анын саламаттыгы ушул тапта абдан кооптуу абалда экендиги дагы баса белгиленген.

Айтмакчы, 49 жаштагы Канышай Мамыркулова Кыргызстанда эркин журналист жана жарандык активист сыңары таанымл. Ал буга дейре «Алиби» гезитинде, «Сентябрь» телеканалында жана «Говори ТВ» басылмасында башкы редакторлук милдетти аркалаган. Акыркы жылдары Фейсбуктагы баракчасында бийликти кескин сындаган билдирүүлөрдү жазып келаткан.

Алишер ТОКСОНБАЕВ, өз кабарчы