24 Бардыгы /

Кыргыз Республикасынын Президентинин Жалал-Абад облусундагы ыйгарым укуктуу өкүлүнүн орун басары Урматбек Самаев облустагы социалдык көйгөйлөрүн чечүү багытында жыйын өткөрдү.

Ага райондук мамлекеттик администрация башчыларынын, шаарлардын мэрлеринин социалдык маселелер боюнча орун басарлары, билим берүү бөлүмдөрүнүн, саламаттыкты сактоо мекемелеринин жетекчилери, социалдык камсыздоо жана миграция башкармалыктарынын башчылары катышты.

Жыйында 2025-жылдын 2 ай аралыгында тармактардагы иштердин аткарылышы, аймактардагы окуучулардын облустук олимпиададагы көрсөткөн жыйынтыктары, жашы жете элек өспүрүмдөр арасындагы кылмыштуулуктун, укук бузуулардын алдын алуу жумуштары талкууланды.

Облус башчысынын орун басары буга чейин Жалал-Абад шаары, Базар-Коргон жана Сузак райондорундагы бир катар саламаттык сактоо мекемелеринде жүргөн текшерүүлөрдүн жыйынтыгы боюнча айтып, абал канааттандырарлык эмес экенин сынга алды. Ага катар энелердин жана ымыркайлардын өлүмүнүн алдын алуу аракеттерин күчөтүүнү тапшырды.

Бекмамат Осмонов атындагы Жалал-Абад мамлекеттик университетинде ар бир район, шаардан экиден кем эмес студенттерди медициналык багытта акысыз билим алуусун уюштуруу тапшырмасынын аткарылышын сурады.

Урматбек Самаев мектептердеги билим сапатын жакшыртууга өзгөчө көңүл буруу керектигин айтып, алдыдагы республикалык олимпиада, жалпы республикалык тестирлөөгө жогорку даярдыктарды көрүүнү эскертти. Ошол эле учурда туристтик мезгилге карата “Жалал-Абад санаториясы”, Арстанбап-Ата айылындагы Турбаза жана пансионаттагы даярдыктар боюнча маалымат алды.