3 Бардыгы /

Бүгүн Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев жана шаар мэри Эрнисбек Ормоков Жалал-Абад шаарындагы курулуш иштери жүргүзүлүп, ушул жылдын август айында пайдаланууга берүү пландалган объектилерге барды.

Алгач облус башчысы Жалал-Абад шаарынын Эркиндик көчөсүндө жайгашкан №1 үй-бүлөлүк дарыгерлер тобунун имаратындагы курулуш иштери менен таанышты. Объектиде курулуш иштери 2022-жылы башталып, азыркы учурда жалпы жумуштардын 80 пайызы аяктаган.

Тилек Текебаев Жалал-Абад шаарынын Курманбек көчөсүндө курулуп жаткан сегиз гектар жер аянтындагы Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппаратынын жана шаар мэриясынын жаңы административдик имаратына барды. Учурда объектинин ички жана сырткы жумуштары, борбордук аянттын курулушу жүрүп, жумуштар 75 пайызга аяктаган.

Кыдыруунун жүрүшүндө ыйгарым укуктуу өкүл Мамлекеттик Ипотекалык Компаниясы тарабынан шаардын Спутник аймактык башкармалыгынын Розы Азимов көчөсүндө курулуш иштери жүргүзүлүп жаткан “Асман резденс – 2” турак жай комплекси, Бокс академиясы жана Раатбек Санатбаев атындагы олимпиадалык резервдеги адистештирилген балдар өспүрүмдөр спорт мектебинин капиталдык оңдоо жумуштарынын жүрүшү менен таанышты.

Облус башчысы аталган обектилерге керектелүүчү каражаттар жана жогорку сапаттагы курулуш материалдары колдонулуп жатканын айтып, жумуштарды белгиленген графикке ылайык жүргүзүүнү тапшырды.

Быйыл Кыргыз Республикасынын Эгемендүүлүгүнүн 34 жылдык майрамы Жалал-Абад шаарында белгиленип, ага карата облус аймагында 34 жаңы социалдык, өндүрүштүк жана кайра иштетүүчү ишканаларды пайдаланууга берүү планы коюлган.