6 Бардыгы /

Базылбеков Манасбек Базылбекович Кыргыз Республикасынын Президентинин Жалал–Абад облусундагы ыйгарым укуктуу өкүлүнүн аппарат жетекчиси кызматына дайындалды.

Тиешелүү буйрукка облус башчысы Тилек Текебаев кол коюп, бүгүн жамаатка тааныштырды.

Манасбек Базылбеков – 1995-жылдын 15-сентябрында туулган. Жогорку юридикалык билимге ээ.

2011–2014-жылдары Ж. Баласагын атындагы Кыргыз улуттук университетинин Кесиптик юридикалык колледжин “Юриспруденция”адистиги боюнча аяктап, “юрист” квалификациясын алган. 2014–2017-жылдары аталган университеттин алдындагы Юридикалык институтта билим алып, бакалавр даражасына ээ болгон. 2017–2019-жылдары ошол эле институттун магистратурасын аяктаган.

Эмгек жолун 2019-жылы “Премьер Право”ЖЧКсында башкы директор кызматынан баштаган. Андан соң ар кайсы жооптуу кызматтарда эмгектенген. Тактап айтканда:

-Кыргыз Республикасынын Транспорт жана коммуникациялар министрлигинде министрдин жардамчысы жана кеңешчиси;

-аталган министрликке караштуу “Өндүрүштүк-инновациялык борбор” мамлекеттик мекемесинде директордун орун басары;

-“БМБ Глобал” ЖЧКсында башкы директор;

-Кыргыз Республикасынын Президентине караштуу Инвестициялар боюнча улуттук агенттигинде директордун жардамчысы жана кеңешчиси;

-Кыргыз Республикасынын Президентинин Жалал-Абад облусундагы ыйгарым укуктуу өкүлүнүн жардамчысы.

3-класстагы мамлекеттик жарандык кызматтын кеңешчиси класстык чинине ээ.

Кошумча билим алып, бир катар эл аралык программаларга катышкан. Анын ичинде жол коопсуздугу жана европалык инновациялык чечимдер боюнча тажрыйба алмашуу программаларына (Литва, Австрия, Нидерланды) катышкан. Ошондой эле Евразиялык изилдөөлөр институтунун Ф.Н. Плевако атындагы стипендиаты жана ЕККУ менен American Councils уюмдарынын “Жогорку Кеңештеги стажировка”программасынын стипендиаты (2015-жыл) болуп саналат.

Кесиптик ишмердүүлүгүндөгү жетишкендиктери жогору бааланып, бир катар мамлекеттик жана ведомстволук сыйлыктарга татыктуу болгон.

Буга чейин ыйгарым укуктуу өкүлдүн аппаратын Адилет Акбаралиев жетектеп келген. Ал башка жумушка өткөндүгүнө байланыштуу өз арызынын негизинде ээлеген кызматынан бошотулган.