6 Бардыгы /

Кечээ, 18-май күнү Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев Сузак районунун Сайпидин Атабеков айыл аймагынын тургундары менен жолугушту.

Жыйынга жалпысынан 250гө жакын жергиликтүү тургун катышып, 30дан ашуун жаран тарабынан 92 маселе көтөрүлдү.

Жолугушуунун жүрүшүндө тургундар айыл аймактагы негизги көйгөйлөр катары таза суу, сугат суу жана жер тилкелерине байланышкан талаштуу маселелерди айтышты.

Мындан сырткары жайыт маселеси, ички жолдордун абалы, жер семирткичтердин баасынын жогорулашы, Бек-Абад айылындагы №16 үй-бүлөлүк дарыгерлер тобунун эскилиги жеткен имаратын жаңылоо, социалдык колдоо жана жеке мүнөздөгү көйгөйлөр боюнча кайрылуулар болду.

Облус башчысы көтөрүлгөн маселелер боюнча тиешелүү облустук жана райондук мекеме-ишканалардын жетекчилерине жеринде иш алып барып, ар бир маселени мыйзам чегинде кароону тапшырды. Айрыкча сугат суу маселесин атайын комиссия түзүү аркылуу комплекстүү карап чыгуу милдетин койду.

Белгилей кетсек, Сузак районунун Сайпидин Атабеков айыл аймагында 31837 калк жашайт.