36 Бардыгы /

Бүгүн, 4-июнда Манас шаарында жаштардын өнүгүүсүнө багытталган “Демилге” жаштар борборунун расмий ачылыш аземи болуп өттү.

Иш-чарага Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев онлайн форматта катышып, куттуктоо сөзүн сүйлөдү. Ошондой эле салтанатка Россия Федерациясынын Тышкы иштер министрлигинин Эл аралык уюмдар департаментинин директорунун орун басары Григорий Устинов, Бириккен Улуттар Уюмунун Өнүктүрүү программасынын Кыргыз Республикасындагы туруктуу өкүлү Александра Соловьева, жергиликтүү бийлик өкүлдөрү, жаштар жана коомчулуктун өкүлдөрү катышты.

Облус башчысы өз сөзүндө борбордун ишмердүүлүгү жаштардын билим алуусуна, лидерлик сапаттарын өнүктүрүүгө, ишкердик көндүмдөрүн калыптандырууга жана жарандык активдүүлүгүн жогорулатууга өбөлгө түзөрүн белгиледи. Ошондой эле борбор жаштарды өз жамааттарынын социалдык-экономикалык өнүгүүсүнө активдүү тартууга, алардын демилгелерин колдоого жана ишке ашырууга шарт түзөрүн айтты.

Борбор мамлекеттик жаштар саясатынын алкагында жаштардын демилгелерин колдоого, алардын потенциалын өнүктүрүүгө жана коомдук турмушка активдүү катышуусуна көмөк көрсөтүүгө багытталган.

“Демилге” жаштар борбору Манас шаарынын мэриясы тарабынан Бириккен Улуттар Уюмунун Өнүктүрүү программасы менен өнөктөштүктө жана Россия Федерациясынын каржылык колдоосу аркылуу түзүлгөн.

Долбоор Кыргыз Республикасын 2030-жылга чейин өнүктүрүүнүн Улуттук программасында белгиленген жаштарды өнүктүрүү, аларды жумуш менен камсыз кылуу жана адамдык капиталды чыңдоо боюнча артыкчылыктуу багыттарды ишке ашырууга багытталган.