868 Бардыгы /

БИШКЕК. 15-апрель 2020-жыл. 9 млн сом турмуш-шарты оор үй-бүлөлөргө гуманитардык көмөк көрсөтүү үчүн багытталды. Бул тууралуу Кыргыз Өкмөтүнүн расмий сайтына жарыяланды.

Тийиштүү чечим турмуштук оор кырдаалда турган адамдарды тамак-аш азыктары менен камсыз кылуу үчүн ыктыярдуу кайрымдуулук түрүндө жеке жана юридикалык жактардан келип түшүүчү акча каражаттарын бөлүштүрүү боюнча комиссиянын кезектеги кеңешмесинин жыйынтыгы боюнча кабыл алынды.

Жыйын жүрүшүндө жашоо-шарты оор үй-бүлөлөр үчүн гуманитардык көмөк алууга билдирмелер каралды.

Келип түшкөн билдирмелер талкууланган соң, өзгөчө абал режими киргизилген калктуу конуштардагы кырдаалды эске алуу менен Кыргыз Республикасынын Эмгек жана социалдык өнүктүрүү министрлигинин депозиттик эсебинен Ош шаарындагы (4 млн сом), Нарын шаарындагы (1 млн сом), Жалал-Абад шаарындагы (1 млн сом), Сузак районундагы (2 млн сом) жана Ноокат районундагы (1 млн сом) муктаж үй-бүлөлөргө гуманитардык көмөк көрсөтүү максатында тамак-аш продуктуларын сатып алууга каражат бөлүү чечими кабыл алынды.