2,340 Бардыгы /

БАТКЕН. Баткен облустук прокуратурасы тарабынан баасы 19 миллион 200 миң сом болгон он гектар жер тилкеси Кара-Бак Айыл Өкмөтүнүн балансына кайтарылды. Бул жөнүндө Башкы прокуратурадан ырасташты.

Маалыматка караганда, прокурордук текшерүүнүн жүрүшүндө аталган Айыл Өкмөтүнүн 2006-жылдын 16-октябрындагы Кыргыз Республикасынын Жер мыйзамынын талаптарын бузуу менен кабыл алынган токтомунун негизинде А.Н. аттуу жаранга он гектар жер тилкеси эч кандай негизисиз ажыратылып берилгендиги аныкталды. Мыйзамсыз жеке менчикке ыйгарылган жер тилкени кайтаруу максатында прокурордук акты келтирилип, жогорудагы токтом жокко чыгарылган жана он гектар жер тилкеси кайрадан муниципалдык менчикке өткөрүлдү.

Баса, атайын текшерүүлөрдүн жыйынтыгы менен топтолгон материалдар Кыргыз Республикасынын Жазык кодексинин 320-беренеси (“Кызматтык абалынан кыянаттык менен пайдалануу”) менен кылмыштардын жана жоруктардын бирдиктүү реестрине катталып, сотко чейинки өндүрүш иши башталды.

Алишер ТОКСОНБАЕВ, өз кабарчы