954 Бардыгы /

ОШ. Ушул жылдын 7-июль күнү Чоң-Алай районуна караштуу Ленин чокусунда капысынан каза тапкан Польша альпинистинин сөөгүн Ата Мекенине жөнөтүүгө Вена (Австрия) шаарындагы камсыздандыруучу компания акча бөлбөй тургандыгы ачыкталды. Бул жөнүндө Ош облустук соттук-медициналык эксперттөө бюросунун танатология бөлүмүнүн башчысы Арап Кожобаев билдирди.

Арап Кожобаевдын айтымында, эми чет өлкөлүк альпинисттин сөөгүн Польшадагы тууган-уруктары алып кетиши ыктымал. Бүгүнкү күндө анын сөөгү танатология бөлүмүндөгү өлүк сактоочу муздаткыч иштебегендиктен, Ош облустук бириккен клиникалык оорукананын мейитканасында гана аргасыздан сакталууда.

– Биздин бөлүмгө Вена шаарындагы камсыздандыруучу компания телефон чалып байланышыптыр. Алар каза тапкан альпинистке акча бөлүп бере албай тургандыгын ачыкташкан. Себеби, альпинист Ленин чокусунун кайсы бир бийиктигине жеткенде каза тапса, ошондо гана компания акча төлөп бермек экен. 7-июлда каза тапкан альпинист 5100 бийиктикте көз жумган. Келишимде ошондой көрсөтүлгөн экен, – деп кошумчалады Ош облустук соттук-медициналык эксперттөө бюросунун танатология бөлүмүнүн башчысы Арап Кожобаев.

Чоң-Алай районундагы Ленин чокусунун бийиктиги 7134 метр. 7-июль күнү болжол менен саат 07:15 чамасында Чоң-Алай районундагы Кашка-Суу Айыл Өкмөтүндөгү Ленин чокусунун 5100 метр бийиктигинде Польшанын 1971-жылы туулган Б.П. аттуу жараны жүрөгү кармап каза тапкан. Баса, Аймактагы базалык лагерге россиялык 12, ал эми польшалык 2 альпинист келген экен. Эки күндөн соң 4400 метр бийиктикти, дагы эки күндөн соң 4800, ал эми 7-июлда 5100 метр бийиктикти багындырышкан. Кайра түшүп келе жатышканда, көч башында келаткан П.Б. эс-учун жоготуп жыгылган. Жасалма дем алдыруу кылганы менен өзүнө келе албастан жеринде эле каза тапкан.

Алишер ТОКСОНБАЕВ, өз кабарчы