1,278 Бардыгы /

ЖАЛАЛ-АБАД. Аксы районундагы Кара-Суу айыл өкмөтүнө караштуу Жүзүмжан айылына ушул жылдын 14-сентябрынан тартып бир айлык мөөнөткө карантиндик чектөө киргизилди. Бул жөнүндө Аксы районунун акими Замирбек Сыдыков өзү маалымдады.

Аким Замирбек Сыдыковдун айтымында, Кыргыз Өкмөтүнүн Ветеринардык жана Фитосанитардык коопсуздук мамлекеттик инспекциясынын Аксы райондук башкармалыгынын жана райондук эпидемияга жана эпизоотияга чукул чара көрүү комиссиясынын чечимине ылайык, «Ветеринария жөнүндө» мыйзамдын 7-беренесине жараша мал-жандык өлгөн айылга карантиндик чектөө киргизүү боюнча буйрук жарыяланды.

“Чектөө коюлган аймакта малдарды жана алардан алынган азык-түлүктөрдү сыртка чыгарууга, башка жактан алып кирүүгө дагы таптакыр тыюу салынды. Ылаңдаган малдын сүтүн пайдаланууга, союуга жана өлгөн малдын терисин сыйрууга, өз алдынча жок кылууга эми эч жол берилбейт! Күйдүргү очогу делген жер бетондолуп корголонуп, белги коюу, малдарды ветеринардык кароодон өткөрүү аракеттери ушул тапта абдан кызуу жүрүп жаткан чагы”, – деп кошумчалады Аксы районунун акими Замирбек Сыдыков.

Ал эми Жүзүмжан айылынын 7 тургуну Аксы райондук аймактык ооруканасында күйдүргү дартына күмөндөлүп жатат. Аталган ооруга чалдыккандардын алды ушул жылдын 2-сентябрынан тартып бейтапканага түшө баштаган. Айтмакчы, ушул жылдын 14-сентябрында Ноокендеги лабораториядан андагы айылда өлгөн малдардын биринен күйдүргү дарты аныкталган.

Алишер ТОКСОНБАЕВ, өз кабарчы