1,608 Бардыгы /

Улуттук банк алтын сатып алуу боюнча “Кумтор Голд Компани” менен келишим түзгөн эмес. Бул тууралуу “Азаттыкка” банктын маалымат кызматы билдирди.

Улуттук банк билдиргендей, алтын валюта резервинин көлөмүн толтуруу саясатынын алкагында банк жергиликтүү өндүрүүчүлөрдөн алтын сатып алат. Операция алтын өндүрүүчү менен Улуттук банктын ортосунда түзүлгөн башкы келишимдин негизинде жүрөт. Бирок “Кумтор Голд Компани” менен Улуттук банк бул багытта келишим түзгөн эмес.

Буга чейин компаниянын тышкы башкаруучусу Тенгиз Бөлтүрүк мындан ары кенде өндүрүлгөн бардык продукцияны Улуттук банк сатып аларын билдирген.

Кыргызстан быйыл май айында Кумтөрдөгү экологияга келтирилген зыян жана салыкка байланыштуу канадалык компанияга 4,2 миллиард доллардай доо койгон. Аны улай кыргыз өкмөтү 17-майда “Центеррага” таандык “Кумтөр Голд” компаниясына тышкы башкаруу киргизген. Канадалык компания дооматтарды четке кагып, Стокгольмдогу Эл аралык арбитражга жана Нью-Йорктогу банкроттуулук боюнча сотко кайрылган. Бийлик мындан ары алтын экспортко чыкпай турганын, Кумтөрдүн бардык продукциясын Улуттук банк сатып аларын айткан.

“Кумтор Голд Компани” өндүрүш көрсөткүчтөрү тууралуу отчетторун жарыялабай калды. Компания мурда 2021-жылы 15 тонна алтын өндүрөрүн жарыялаган. Былтыр Кумтөрдө 17 тонна алтын өндүрүлгөн.

Буга чейин “Кыргызалтын” ишканасына таандык Кара-Балтадагы аффинаждоочу заводдо иштелип чыккан алтын куймалары дүйнөдөгү Good delivery (ишеничтүү жеткирүүчү) макамы менен эч тоскоолдуксуз сатылып келген. Good delivery – дүйнөдөгү алтын базарындагы белгилүү марка десек болот.

Лондондогу Баалуу металлдар базарынын ассоциациясы “Кыргызалтындын” аккредитациясын 17-сентябрдан тарта токтотконун, буга июнь айында алтын аффинаждоочу “заводдогу алдамчылыкка шек саноодон” улам текшерүү себеп болгонун билдирген.