1,350 Бардыгы /

БАТКЕН. Тажикстанга белгисиз кишилер алып кирип кетишкен кыргызстандык эки мектеп окуучусу 2005-жылы туулушкан Ю.Ш. менен Н.Э. атайын сүйлөшүүнүн жыйынтыгында Мекенине кайтарылды. Бул фактыны Кыргызстандын Улуттук коопсуздук мамлекеттик комитетинен (УКМКдан) дагы тастыкташты.

Ошентип, Кыргыз Республикасынын Президентинин Баткен облусундагы ыйгарым укуктуу Өкүлү Абдыкарим Алимбаев баштаган Баткен, Лейлек райондорунун акимдери жана облустук күч түзүмдөрүнүн жетекчилери, ошондой эле Тажикстандын Согдий облусунун аткаруу бийлигинин төрагасы Раджаббой Ахмадзода баштаган күч түзүмдөрүнүн жетекчилери менен эки тараптуу сүйлөшүүсүнүн жыйынтыгында гана бошотулду.

Анткени, Лейлек районунун Жаштык айылынын 16 жаштагы эки тургунун жана Mercedes-Benz Sprinter автоунаасын Тажикстан тараптан келген белгисиз кишилер 23-сентябрда алып кетишкен эле. УКМКнын баштапкы маалыматына караганда, өспүрүмдөр шарттуу чек ара тилкесинде аткезчилердин жүгүн автоунаага жүктөөгө жардам берип жүрүшкөн. УКМК өспүрүмдөрдү кармап кетүүгө Тажикстандын күч органдарынын катышы бар-жогу ушул тапта такталып жаткандыгын кошумчалады. Бирок, бул окуя боюнча Тажикстан тарап расмий маалымат тарата элек. Чыр-чатактын күчөшүнө жол бербөө максатында Лейлек районунда жайгашкан чек ара бөлүктөрү күчөтүлгөн тартипте иштөөгө өткөн эле.

Айтмакчы, ушул жылдын 23-сентябрында Кыргызстан менен Тажикстан чектешкен башка бир аймакта (Баткен районунда) мектеп окуучулары чырдаша кетип, кыргызстандык төрт окуучу, тажик тараптан эки бала менен бир чоң киши жапа чегишкен. Чек арада быйыл 28-апрелден 1-майга чейин уланган куралдуу жаңжалда эки тараптан ондогон адам курман болуп, жүздөгөн имараттар дагы кыйраган.

Алишер ТОКСОНБАЕВ, өз кабарчы