1,401 Бардыгы /

БИШКЕК. АКШнын эл аралык өнүктүрүү Агенттиги (USAID) Бишкектеги ооруканаларга жекече коргонуу каражаттарын жана медициналык буюм-тейимдерди тапшырды. Улуттук госпиталга жана Республикалык жугуштуу оорулар клиникалык ооруканасына 19 миң жуп кол кап, 5 миң респиратор, 960 коргоочу көз айнек, тайып кетүүгө каршы 10 миң бут кийим каптары, пациенттерди тейлөө үчүн 50 кардиостимулятор ыроолонду.

Саламаттыкты сактоо министрлиги аталган дарылоо мекемелерин COVID-19 менен ооруканага жаткырылган бейтаптардын саны эң көп деп аныктады. 1 миллион сомдон ашык суммадагы медициналык шаймандар АКШнын Кыргыз Республикасына COVID-19га каршы күрөшүүдө көмөк сыңары гана берилди.

Улуттук госпиталдын башкы докторунун вазийпасын аткаруучу Токтобай Маанаевдин баамында, мындай күтүлбөгөн колдоо пандемия менен күрөшүүдө абдан эле маанилүү.

• Дарыгерлер үчүн тренингдер, медициналык жабдуулар жана

шаймандардын жардамы аркасында биз акыркы толкундарда өлүмдүн деңгээлин бир топ төмөндөткөнгө гана жарадык, – деп кашкайган чындыкты моюндады Улуттук госпиталдын башкы докторунун вазийпасын аткаруучу Токтобай Маанаев.

Айтмакчы, быйылкы июль айында USAID COVID-19 менен ооругандардын саны көп болгон беш ооруканага заманбап жабдуулар жана башка шаймандар таратылды.  Булардын арасында COVID-19 оор учурларынан бат диагноздоо жана дарылоо үчүн маанилүү кычкылтек концентраторлор, ларингоскоптор жана башка керектүү жабдуулар бар.

USAIDдин Кыргызстандагы башчысынын милдетин аткаруучу Кит Симмонс COVID-19 глобалдык жана Кыргыз Республикасындагы саламаттыкты сактоо системалары үчүн олуттуу көйгөй бойдон кала берээрин баса белгиледи: – Биз бардык медициналык кызматкерлерге бул пандемия учурунда берилгендиги жана күжүрмөн эмгеги үчүн терең ыраазыбыз!

Ошентип, USAID Кыргыз Республикасына колдоо көрсөтүүнү мындан арыдагы ырааттуу улантат. Пандемия башталгандан бери USAID Кыргыз Республикасына өлкөнүн COVID-19 менен күрөшүү аракеттерин колдоо үчүн 7 миллион доллардан ашык каражат сарптады.

Алишер ТОКСОНБАЕВ, өз кабарчы