924 Бардыгы /

БАТКЕН. Үстүбүздөгү жылдын 28-29-апрелинде жүз берген Кыргыз-Тажик чек арасындагы жаңжалда жабыркаган Баткен районундагы 40 үйдүн курулушу аяктоо алдында турат. Бул тууралуу президенттин Баткен облусундагы ыйгарым укуктуу Өкүлчүлүгүнөн билдиришти.

Маалыматка караганда, ушул тапта Баткен районунда жалпысынан 140 үй курулуп, ал эми 100 үй Лейлек районунун аймагында толугу менен бүткөрүлүп, ээлерине тапшырылды.

Баткен районундагы 40 үйдүн ичинен тогузу Ак-Сай айылында бүткөрүлүп, жаңы үйгө үй ээлери көчүп киришти. Ал эми жакынкы аралыкта калган 31 үй дагы пайдаланууга тапшырылат. Мындан тышкары президент Садыр Жапаровдун түздөн-түз демилгеси жана жеке ишкерлердин колдоосу аркасында 36 шейит кеткен эр азаматтардын жакындарын колдоо максатында дагы 36 үй курулган.

Эскерте кетчү жагдай: үстүбүздөгү жылдын 28-апрелинде Баткен районунун Көк-Таш айылындагы “Головной” суу бөлүштүрүүчү жайына Тажикстандын жарандары видеокөзөмөл орното баштаган. Ага кыргызстандыктар караманча каршы чыгышкан. Ушундай көп өтпөй эки элдин жарандары бири-бирине таш ыргытуудан абал андан ары ырбаган. Ошентип, Кыргыз-Тажик чек арасындагы чырдан жалпы 190 кыргызстандык жабыркап, 36 адам набыт тапкан.

Алишер ТОКСОНБАЕВ, өз кабарчы