852 Бардыгы /

ОШ. Ош облусундагы Алай районуна караштуу эң алыскы Сары-Таш айылында суу менен камсыздоо системасынын курулушу аяктап, акыры биротоло пайдаланууга тапшырылды. Бул жөнүндө Кыргыз Республикасынын Коомчулукту өнүктүрүү жана инвестициялоо агенттигинен (АРИСтен) билдиришти.

АРИСтин маалыматына караганда, таза суу менен камсыздоо системасы толук бойдон Дүйнөлүк Банк тарабынан каржыланып, Кыргыз Республикасынынминистрлер кабинетинин колдоосу аркасында АРИС тарабынан ийгиликтүү жүзөгө ашырылган «Айылды суу менен камсыз кылуу жана санитарияны туруктуу өнүктүрүү» долбоору тарабынан курулду. Айтмакчы, Сары-Таш – деңиз деңгээлинен 3000 метрден ашык бийиктикте жайгашкан эң алыскы, анан дагы абдан бийик тоолуу кыштак. Буга дейре элеттиктерде таза суу абдан чоң көйгөй жаратып келгендиги эч кимге жашыруун эмес.

Ошентип, акыры пайдаланууга тапшырылган жаңы суу системасын курууда аталган долбоордун алкагында жалпысынан 28 миллион 268 миң 138 сомдук жумуш сапаттуу аткарылды. Маселен, капиталдык суу алуучу жай (водозабор) жана 2 резервуар курулду. 14 чакырымдан ашык суу түтүктөрү дагы тартылды. Мындан ары Сары-Таш айылынын жашоочудары жана мектеп, бала бакча, бейтапкана өңдөнгөн социалдык объектилер дагы катарынан таза суу менен толук кандуу жана эч үзгүлтүксүз камсыз этилди.

Алишер ТОКСОНБАЕВ, өз кабарчы