1,812 Бардыгы /

Урматтуу Жалал-Абад облусунун тургундары жана меймандары!

Сиздерди босого алдында турган жаңы 2022-жылыңыздар менен Кыргыз Республикасынын Президентинин Жалал-Абад облусундагы ыйгарым укуктуу өкүлүнүн аппаратынын жана жеке өзүмдүн атымдан чын дилимден куттуктайм!

Жалал-Абад облусубуздун өнүгүүсүндө өтүп бара жаткан 2021-жылы бир топ иш аракеттер жасалды. Облус аймактарын өнүктүрүү, инвентаризация тартуу, калкты жумуш орундары менен камсыздоо, жол куруу, өндүрүштү жандантуу, кайра иштетүүнү жолго коюу сыяктуу бир катар багыттарда алгылыктуу жумуштар башталды. Бул алкакта бардык аймактарда жергиликтүү бийлик жетекчилеринин алдына эл менен тыгыз иштөө, жаралган көйгөйлөрдү тез аранын ичинде чечүүнү колго алуу тапшырмалары күчөтүлдү.

Өлкө башчыбыздын тапшырмасына ылайык, 2022-жылы да бардык тармактарды санариптештирүү, саламаттыкты сактоо, билим берүүнүн сапатын жакшыртуу иштери улантылат. Мындагы эң башкы кадам керектүү шарттарды жаратууга жумшалмакчы. Көрүлүп жаткан бардык камылгалар тургундарыбызга ыңгайлуулук жаратуу менен бирге, алардын жашоо шартын жакшыртууга багытталган. Буйруса келээрки жылы да облусту өнүктүрүүгө койгон жигердүү аракеттерибиз мындан кем болбойт.

Сиздерди кирип келе жаткан 2022-жыл жаңы жылыңыздар менен чын дилимден куттуктайм!  Жаңырган жыл жакшылыктардын, жаркын маанайдын, жакшы иштердин, ийгиликтердин жылы болсун! Жаңы жылды өлкөбүз аны менен катар облусубуз тынчтыкта өнүгүүнүн жолунда алга карай сапар уласын. Ар бириңиздерге бекем ден соолук, узун өмүр жана  бакыт таалай каалайм.

Абсаттар СЫРГАБАЕВ, КРдин Президентинин Жалал-Абад облусундагы ыйгарым укуктуу өкүлү