849 Бардыгы /

БАТКЕН. Акыркы күндөрдө өтө нөшөрлөп жааган катуу жамгырдын кесепетинен Баткен районун Суу-Башы Айыл Өкмөтүнүн Бөжөй айылын катарынан сел каптап, айыл тургундарынын короо-сарайларына дейре кирип, а түгүл ички жолдорду дагы катарынан жууп таштады.

Баткен районунун акими Учкунбек Жоробаев жапа чеккендердин үйлөрүнө дейре баш багып, жеринде ал-акыбалын сураштырып, мындан ары кайрадан калыбына келтирүү жумуштарын өзүнүн такай көзөмөлүнө алаарын катуу убадалады. Андыктан, ушул тапта ыкчам тартипте турак жайларды калыбына келтирүү, тазалоо жумуштары менен катар келтирилген зыяндарды толук бойдон аныктоо жумуштары дагы кызуу жүрүүдө. Тазалоо жараянына ӨКМдин жарандык кызматынын атайын техникалары жана жергиликтүү тургундар дагы кошо тартылды.

Баса, Баткен районуна караштуу Бөжөй айылынын сел өтүүчү сайлары жана 65ке жакын үй- жайлардын короо-сарайлары сел шагылдарына толуп калды. Белгилей кетчү жагдай: бул күнү Баткен облусунун Лейлек, Баткен жана Кадамжай райондорунда дагы алмак-салмак сел жүрүп, олуттуу материалдык чыгымдарга алып келди. Бактыга жарага адам өмүрүнө зыян келтирилген жок!

Алишер ТОКСОНБАЕВ, өз кабарчы