3 Бардыгы /

Кечээ, 26-апрелде  Манас шаарында массалык чуркоо марафону уюштурулуп, анын жалпы байге фонду 300 миң сомду түздү.

Иш-чарага өлкөнүн ар кайсы аймактарынан келген миңге жакын жаран катышты. Катышуучулар шаардагы Азаттык аянтынан старт алышып, үч чакырым аралыкты чуркап өтүп, Достук эс алуу багына чейин барышты.

Жеңүүчүлөрдү Кыргыз Республикасынын Президентинин Жалал-Абад облусундагы ыйгарым укуктуу өкүлү Тилек Текебаев куттуктады.

Өз сөзүндө ал бул спорттук иш-чара жарандардын биримдигин чыңдоого, сергек жашоо образын жайылтууга багытталган маанилүү саамалык экенин белгиледи. Ошондой эле марафондо алдыңкы орундарды ээлеген жеңүүчүлөргө кубок, медаль жана акчалай сыйлыктарды тапшырды.

Мындан тышкары, ыйгарым укуктуу өкүл марафонду уюштурууга салым кошкон өнөктөштөргө, анын ичинде жергиликтүү өндүрүүчүлөрдүн бири болгон “Келечек” ачык акционердик коомунун жетекчилигине ыраазычылык билдирди.

Ал ошондой эле кийинки марафон профессионалдуу чуркоо спорту менен алектенген спортчулар арасында өткөрүлөрүн кошумчалады.

Иш-чаранын алкагында Соода-өнөр жай палатасы тарабынан жергиликтүү өндүрүүчүлөрдүн продукциялары коюлган жарманке уюштурулуп, кол өнөрчүлөрдүн эмгектери көргөзмөгө коюлду. Марафон аркан тартыш сыяктуу улуттук оюндар менен коштолду.