957 Бардыгы /

Волгоград шаарында Куран китебин өрттөгөнү үчүн камакка алынган Никита Журавель Грозныйдагы тергөө абагында аны Чеченстандын башчысы Рамзан Кадыровдун 15 жаштагы уулу Адам Кадыров сабаганын билдирди.

Республиканын акыйкатчысы Мансур Солтаевдин айтымында, мындай арыз менен ага Журавель өзү кайрылган.

“Менин атыма тиешелүү кайрылуу келгенден кийин тергөө абагына бардым… Никита Чеченстандын башчысы менен жолугуп, Рамзан Кадыров камерадан чыгып кеткенден кийин аны уулу Адам Кадыров сабаганын айтты”, – деп билдирди Солтаев.

“Грозный-Информ” басылмасы Журавелдин кайрылуусу делген кагаздын сүрөтүн жарыялады. Анда аны менен ислам динин кабыл алуу маселеси боюнча Рамзан Кадыров жолукканы, ал кеткенден кийин уулу Адам Кадыров келип сабаганы жазылган.

Азырынча Чеченстандын башчысы бул билдирүү боюнча комментарий бере элек.

Волгоград шаарындагы мечиттин алдында Куран китеби өрттөлгөн видео социалдык түйүндөргө 19-майда жарыяланган. Полиция эки күндөн кийин бул ишке шектүү катары Крымдан көчүп келген Волгограддын жашоочусу Никита Журавель кармалганын билдирген.

Орусиянын Тергөө комитетинин башчысы Александр Бастрыкин ишти Чеченстандын тергөөчүлөрүнө өткөрүп берүү тууралуу буйрук чыгарган. Көп өтпөй Журавель Грозный шаарына жеткирилген.

Рамзан Кадыров өткөн жылы октябрда эрезеге жете элек үч уулу – Ахмат, Эли жана Адам Украинадагы согуштук аракеттерге катышып келгенин билдирген. Далил катары ал балдары пулемёттон жана гранатамёттон атып жатканы тарылган видеону жарыялаган. Чеченстандын оппозициялык телеграм-каналдары ал видео фронтто тартылбаганын жазып чыгышкан.

Быйыл март айында Кадыровдун эки уулу – 17 жаштагы Ахмат менен 15 жаштагы Адам “Терроризмге каршы күрөштө өзгөчөлөнгөнү үчүн” деген төш белги менен сыйланган.