717 Бардыгы /

БАТКЕН. Кыргыз Республикасынын УКМКсына караштуу Мамлекеттик Чек ара кызматынын маалымат жана коммуникация башкармалыгы үстүбүздөгү жылдын 16-октябрында Кыргыз чек арачылары мамлекеттик чек арадан аткезчилик жүктүн алып өтүү бир нече аракетине жана ири мүйүздүү малдын мыйзамсыз айдалып өтүшүнө бөгөт коюшкандыгын маалымдады.

 Айтмакчы, Баткен облусуна карашту Лейлек чек ара отрядынын чек арачылары Сай жергесинде кызмат өтөө маалында Opel Astra маркассындагы автоунаа менен уруксат берүүчү документтери жок Тажикстандан Кыргызстанга 150 кило жер жаңгак жана 95 кило көк чай алып чыгуга аракет кылган 1990-жылы туулган К.У. аттуу  Кыргыз Республикасынын жаранын кармашты. Ушул эле күнү, 16-октябрда, мамлекеттик чек ара сызыгына жакын жерде Кушулук-Сай жергесинде Hyundai Starex маркасындагы автоунаа менен Кыргызстандан Тажикстанга болжол менен 1050 кило кумшекерди мыйзамсыз алып өтүүгө аракет кылган 1996-ж.т. Т.Х., аттуу Кыргыз Республикасынын жараны дагы колго түштү. Кийинчерээк Лейлек чек ара отрядынын чек арачылары Mercedes-Benz маркасындагы эки автоунаа менен Тажикстанга 7 тоннадан ашык көмүрдү мыйзамсыз киргизүүгө аракет кылышкан айдоочуларды дагы туткундашты. Мамлекеттик чек аранын башка тилкесинде Жалал-Абад облусунун Ала-Бука районунда Ала-Бука чек ара отрядынын чек арачылары кызмат өтөө учурунда Кыргызстандан Өзбекстанга ири мүйүздүү малды айдап өтүп жаткан адамдардын тобун байкашты. Кыргыз Чек арачыларын көрүшкөндө, чек ара тартибин бузгандар качып жөнөшкөн. Эскертүү иретинде атылган окко көңүл бурбастан, чек араны бузгандар малды таштай салып качып жашынууга аракет кылышты.                            

 Ошентип, алдын ала алынган маалыматтарга караганда кармалган аткезчилик жүктүн, ошондой эле ири мүйүздүү малдын баасы 500 000 сомдо ашты. Тиешелүү документтер толтурулган соң кармалган жарандар, ири мүйүздүү мал жана аткезчилик жүк мындан аркы териштирүү иштери үчүн  компетенттүү органдардын кызматкерлерине өткөрүлүп берилди.     

          Алишер ТОКСОНБАЕВ, өз кабарчы